ବାଲେଶ୍ବର: କୋରୋନା କଟକଣା ପାଇଁ ଯେତେବେଳେ ଲକଡାଉନ ଘୋଷଣା କରାଯାଇଥିଲା ସେତେବେଳେ କିନ୍ତୁ ଜଣେ ଚାଷୀ ନିଜ ଚାଷ କାର୍ଯ୍ୟରେ ବ୍ୟବହାର କରିବା ପାଇଁ ତିଆରି କରିଛନ୍ତି ଏକ ପାୱାର ଟିଲର । ସେ ପୁଣି ଏକ ଅଦରକାରୀ ସ୍କୁଟର ଇଂଜିନରୁ ତିଆରି ହୋଇଛି । ଏମିତି ଜଣେ ଚାଷୀଙ୍କ କାହାଣୀ ଆମେ ଦେଖାଇବାକୁ ଚାହିଁବୁ ।
ବାଲେଶ୍ଵର ଜିଲ୍ଲା ଖଇରା ବ୍ଲକ କଣ୍ଟିଗଡ଼ିଆ ଗ୍ରାମର ଭାସ୍କର ମହାରଣା ଜଣେ ଚାଷୀ ହୋଇଥିବା ବେଳେ ତାଙ୍କର ଏକ କମାରଶାଳ ରହିଛି । ଲକଡାଉନ ଯୋଗୁଁ ଭାସ୍କର ଘରେ ବସି କିଛି ନୂଆ ଉଦ୍ଭାବନ ନେଇ ଚିନ୍ତା କରିଥିଲେ । ଏକ ଅଦରକାରୀ ସ୍କୁଟର ଇଞ୍ଜିନ ଓ ନିଜର କାରିଗରୀ ଜ୍ଞାନକୁ ଖଟାଇ ଭାସ୍କର ତିଆରି କଲେ ପାୱାର ଟିଲର । ନିଜସ୍ବ ଜ୍ଞାନ କୌଶଳରେ ଭାସ୍କର ସମ୍ପୂର୍ଣ୍ଣ ଭାବେ ଦେଶୀ ପ୍ରକ୍ରିୟାରେ ଏମିତି ପାୱାର ଟିଲର ତିଆରି କରିଛନ୍ତି । ଏହି ଯନ୍ତ୍ରପାତି ତିଆରି କରିବାରେ ତାଙ୍କ ପୁଅ ତାଙ୍କୁ ସହଯୋଗ କରିଛନ୍ତି । ଏହି ପାୱାର ଟିଲରଟିକୁ ତିଆରି କରିବା ପାଇଁ ତାଙ୍କୁ ୨ମାସ ସମୟ ଲାଗିଥିଲା । ଏଥିରେ ରାଜଦୂତ ମଟର ସାଇକେଲ ହ୍ୟାଣ୍ଡେଲ, ମଟର ସାଇକେଲ ଚେନ୍, ବୋଲେର ଡିସ୍, କବାଡିଆ ଏଙ୍ଗଲ ଓ ଲଙ୍ଗଳ ୨ଟିକୁ ବ୍ୟବହାର କରି ଏକ କାର୍ଯ୍ୟକ୍ଷମ ପାୱାର ଟିଲର ତିଆରି କରି ସମସ୍ତଙ୍କ ପ୍ରଶଂସାର ପାତ୍ର ହୋଇଛନ୍ତି ।
ଏହି ପାୱାର ଟିଲର ଦ୍ବାରା ଖରା ଓ ବର୍ଷା ଦିନରେ ବିଲରେ ହଳ କରାଯାଇପାରୁଛି । କାଦୁଅରେ ହଳ କରିବା ପାଇଁ କଷ୍ଟ ହେଉଥିବା ଜଣାପଡିଛି । ତେବେ ଭାସ୍କରଙ୍କୁ ସରକାରୀ ସ୍ତରରେ ସହଯୋଗ ମିଳିଲେ ସେ ଆଗକୁ ଆହୁରି ଏମିତି ନୂଆ ନୂଆ ଉଦ୍ଭାବନ କରି ପାରିବେ ବୋଲି ଅଞ୍ଚଳବାସୀ ମତ ରଖିଛନ୍ତି ।
ବାଲେଶ୍ବରରୁ ଜୀବନଜ୍ୟୋତି ନାୟକ,ଇଟିଭି ଭାରତ
