ବାଲେଶ୍ୱର: ତୀର୍ଥଯାତ୍ରୀଙ୍କୁ ଚଢା ଦରରେ ଟିକେଟ ବିକ୍ରି କରିବା ମହଙ୍ଗା ପଡିଛି । ଅଭିଯୋଗ ମୁତାବକ ଜଣେ ଦଲାଲକୁ ଗିରଫ କରିଛି ଆରପିଏଫର କ୍ରାଇମବ୍ରାଞ୍ଚ ସ୍କ୍ବାଡ । ବାଲେଶ୍ବର ଷ୍ଟେସନରୁ ଅଭିଯୁକ୍ତକୁ ଗିରଫ କରିଛି ଖଡ଼ଗପୁର ସ୍କ୍ୱାଡ ।
ଭିଡ଼ିଓ ସୌଜନ୍ଯ: ସମ୍ବାଦଦାତା, ବାଲେଶ୍ୱର
ଦଲାଲ ପାଖରୁ 2ଲକ୍ଷ 30 ହଜାର 440 ଟଙ୍କାର ଟିକେଟ, ନଗଦ 6800 ଟଙ୍କା ଏବଂ 33ଟି ଲାଇଭି ଟିକେଟ କ୍ରାଇମବ୍ରାଞ୍ଚ ଜବତ କରିଥିବା ଜଣାପଡିଛି । ଗିରଫ ଜଣକ ହେଲେ ଦାନ୍ତୁନ ଥାନା ଅନ୍ତର୍ଗତ ନେକୁଷୁଣି ଅଞ୍ଚଳର ନିତାଇ ଦାସ । ସେ ଗୌରାଙ୍ଗ ତୀର୍ଥଯାତ୍ରୀ ନାମକ ଏକ ଏଜେନ୍ସିର କର୍ମଚାରୀ ।
ଏହି ଏଜେନ୍ସି ବିଭିନ୍ନ ଦଲାଲ ମାନଙ୍କ ସହାୟତାରେ 4 ମାସ ପୂର୍ବରୁ ଟିକେଟ କିଣି ଯାତ୍ରୀଙ୍କୁ ଚଢା ଦରରେ ବିକ୍ରୀ କରୁଥିବା ଅଭିଯୋଗ ହୋଇ ଆସୁଥିଲା । ବିଶେଷ ସୂତ୍ରରୁ ଖବର ପାଇ କ୍ରାଇମବ୍ରାଞ୍ଚର ଏହି ଟିମ୍ ବାଲେଶ୍ୱର ଷ୍ଟେସନରୁ ଉକ୍ତ ଦଲାଲକୁ ଗିରଫ କରିବାରେ ସମର୍ଥ ହୋଇଛି ।
ବାଲେଶ୍ୱରରୁ ଜୀବନଜ୍ୟୋତି ନାୟକ, ଇଟିଭି ଭାରତ
