ବାଲେଶ୍ବର: ମ୍ୟୁନିସିପାଲଟି ଆଗରେ ଧାରଣା ଦେଲା ବିଜେପି । ବାଲେଶ୍ବର ପୌରପାଳିକାରେ ବିପର୍ଯ୍ୟସ୍ତ ପରିମଳ ବ୍ୟବସ୍ଥା ଓ ବ୍ୟାପକ ଅନିୟମିତତା ବାବଦରେ ରାଜ୍ୟ ବିଜେପି ଯୁବମୋର୍ଚ୍ଚାର ଉପ ସଭାପତି ମାନସ କୁମାର ଦତ୍ତଙ୍କ ନେତୃତ୍ବରେ ଭାରତୀୟ ଜନତା ପାର୍ଟି, ବାଲେଶ୍ବର ମ୍ୟୁନିସିପାଲଟି ସମ୍ମୁଖରେ ଗଣଧାରଣା ଦେଇଛି।
ତେବେ ସହରରେ ଜଳ ନିଷ୍କାସନ, ରାସ୍ତାଘାଟ, ପିଇବା ପାଣି, ସଫେଇ ଆଦି ମୌଳିକ ବିଷୟକୁ ନେଇ ବ୍ୟାପକ ସମସ୍ୟା ଉପୁଜିଛି । ଜବରଖଲ ଓ ମରାମତି ଅଭାବରୁ ଇଂରେଜ ଅମଳରୁ ଥିବା ୪ଟି ମହାନାଳର ଚିହ୍ନବର୍ଣ୍ଣ ଏବେ ମିଳୁନାହିଁ । ସହରର ଚାରିଆଡେ କୁଢକୁଢ ଅଳିଆ। ସହରର ସମସ୍ତ ଡ୍ରେନ ପ୍ରାୟତଃ ୬୦ ରୁ ୭୦ ପ୍ରତିଶତ ଅଳିଆ ଆବର୍ଜନାରେ ପୋତି ହୋଇଯାଇଥିବା ବେଳେ ସଫେଇ ପାଇଁ କେନ୍ଦ୍ରରୁ ଆସୁଥିବା କୋଟି କୋଟି ଟଙ୍କା, ଠିକାସଂସ୍ଥା ଓ ପ୍ରଶାସନିକ ଅଧିକାରୀଙ୍କ ମଧୁ ଚନ୍ଦ୍ରିକା ଯୋଗୁଁ ବାଟମାରଣା ହେଉଥିବା ଅଭିଯୋଗ ହୋଇଛି।
ସେହିପରି ଅମୃତ ଯୋଜନାରେ ଘରେ ଘରେ ସ୍ବଚ୍ଛ ପାନୀୟ ଜଳ ପରିବର୍ତ୍ତେ ମିଳୁଛି ଗୋଳିଆ ପାଣି । ଯାହା ସହରର ସାଧାରଣ ଜନତାଙ୍କର ସ୍ବାସ୍ଥ୍ୟ ବ୍ୟବସ୍ଥାକୁ ବିପଦକୁ ଠେଲିଦେଇଛି । ଏହିଭଳି ୫ଟି ଦାବି ଯୁଦ୍ଧକାଳୀନ ଭିତ୍ତିରେ ସମାଧାନ ପାଇଁ ପ୍ରଶାସନ ପାଖରେ ଦାବି କରିଛି ବିଜେପି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
