ବାଲେଶ୍ବର: ଆଜି 12 ଘଣ୍ଟିଆ ବାଲିଆପାଳ ବନ୍ଦ ଡାକରା ଦେଇଛି ବିଜେପି । ନାବାଳକ ମୃତ ଘଟଣାରେ ପୋଲିସର ଏକ ତରଫା ଓ ମନମୁଖୀ କାର୍ଯ୍ୟାନୁଷ୍ଠାନକୁ ନେଇ ବନ୍ଦ ଡାକରା ଦିଆଯାଇଛି । ସମସ୍ତ ଦୋକାନ ବଜାର ବନ୍ଦ ରହିବା ସହ ଗାଡି ଚଳାଚଳ ଠପ୍ ହୋଇପଡ଼ିଛି । ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ 5 ପ୍ଲାଟୁନ ଫୋର୍ସ ମୁତୟନ କରାଯାଇଛି । ସେମାନଙ୍କ ମଧ୍ୟରେ 20 ଜଣ ଅଧିକାରୀ ଓ ବସ୍ତା ଏସଡିପିଓ ମଧ୍ୟ ଘଟଣାର ସ୍ଥିତି ଉପରେ ନଜର ରଖିଛନ୍ତି ।
ଗତ ଜୁଲାଇ 26ରେ ବାଲିଆପାଳ ଇଡୋକ ଛକ ସ୍ଥିତ ରାଜଧାନୀ ଢାବାରୁ ନାବାଳକର ସନ୍ଦେହ ଜନକ ମୃତ ଦେହ ଉଦ୍ଧାର ହୋଇଥିଲା । ଯାହାକୁ ନେଇ ଗ୍ରାମବାସୀ ଉତ୍ତ୍ୟକ୍ତ ହୋଇ ପୋଲିସକୁ ମାଡ ମାରିଥିଲେ । ଏହା ପରେ ପୋଲିସକୁ ମାଡ ମାରିବା ଘଟଣାରେ 13 ଜଣ ଗ୍ରାମବାସୀଙ୍କୁ ଗିରଫ କରିଥିଲା । ତେବେ ନାବାଳକ ମୃତ ଘଟଣାରେ ତଦନ୍ତକୁ ଦୃଷ୍ଟି ନ ଦେଇ ପୋଲିସ ଏକତରଫା କାର୍ଯ୍ୟ କରୁଥିବାର ଅଭିଯୋଗ ଆଣିଛି ବିଜେପି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
