ବାଲେଶ୍ବର: ପୁଣି ଥରେ ଚର୍ଚ୍ଚାରେ ଅବସରପ୍ରାପ୍ତ ଭିଜିଲାନ୍ସ କର୍ମଚାରୀ ଉଜ୍ଜ୍ବଳ କୁମାର ବ୍ରହ୍ମା । ରାଜ୍ୟ ଦୁର୍ନୀତି ମୁକ୍ତ ଆହ୍ବାନର ପ୍ରଚାର ପ୍ରସାର ନିମନ୍ତେ ନୂଆ ପନ୍ଥାମାନ ଆପଣାଉଛନ୍ତି । ଦୁର୍ନୀତିମୁକ୍ତ ସରକାରୀ କାର୍ଯ୍ୟାଳୟ ପାଇଁ 'ଭ୍ରଷ୍ଟାଚାର ଓ ସମାଧାନ' ଲକ୍ଷ୍ୟ ନେଇ ଏକ ଗାଡ଼ିରେ ବ୍ୟାନର ମାରି ବିଭିନ୍ନ ସ୍ଥାନରେ ପ୍ରଚାର କରୁଛନ୍ତି ।
ରାଜ୍ୟରେ ସରକାରୀ ବ୍ୟବସ୍ଥାର ପରିବର୍ତ୍ତନ ଓ ଭ୍ରଷ୍ଟାଚାର ବିରୋଧରେ ନାରା ଦେଇଥାନ୍ତି ଅବସରପ୍ରାପ୍ତ ଭିଜିଲାନ୍ସ ଏସପି ଉଜ୍ଜ୍ବଳ କୁମାର ବ୍ରହ୍ମା । ବିଭିନ୍ନ ସରକାରୀ କାର୍ଯ୍ୟାଳୟ ଆଗରେ ଜୋତା ପଲିସ କରି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟୁଥିବା ଉଜ୍ଜ୍ବଳ ଜନସାଧାରଣଙ୍କୁ ଆହ୍ବାନ ଦେବାପାଇଁ ନୂଆ ପନ୍ଥା ଆପଣାଇଛନ୍ତି ।
ନିଜ ଗାଡ଼ିରେ ବୁଲି ବୁଲି ବିଭିନ୍ନ ଶିକ୍ଷାନୁଷ୍ଠାନ, ବଜାର, ସରକାରୀ ଅଫିସ ଯାତ୍ରା କରି ଜନଜାଗରଣ ସୃଷ୍ଟି କରୁଛନ୍ତି। ଭ୍ରଷ୍ଟାଚାର ଓ ସମାଧାନ ପାଇଁ ସ୍ବଚ୍ଛା ସେବକ ପଞ୍ଜିକରଣ କରନ୍ତୁ ଏବଂ କରାନ୍ତୁ ବୋଲି ଲୋକଙ୍କୁ ବୁଝାଉଛନ୍ତି। ଏହି ଅଭିଯାନରେ ସଭିଙ୍କୁ ସାମିଲ ହେବା ପାଇଁ ସେ ନିବେଦନ ମଧ୍ୟ କରିଛନ୍ତି।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
