ବାଲେଶ୍ୱର: ମୋବାଇଲ ଲୁଟେରା ଗ୍ୟାଙ୍ଗକୁ ଗିରଫ କରିଛି ସହଦେବ ଖୁଣ୍ଟା ଆଦର୍ଶଥାନା ପୋଲିସ । ସେମାନଙ୍କ ନିକଟରୁ ମୋବାଇଲ ଜବତ କରିବା ସହ ଲୁଟରେ ବ୍ୟବହୃତ ବାଇକ ମଧ୍ୟ ପୋଲିସ ଜବତ କରିଛି । ଗତ 19 ତାରିଖରେ ସହଦେବଖୁଣ୍ଟା ବସଷ୍ଟାଣ୍ଡ ନିକଟରୁ ସୌରଭ ଚୌଧୁରୀ ନାମକ ଜଣେ ବ୍ୟକ୍ତିଙ୍କ ପାଖରୁ ମୋବାଇଲ ଲୁଟ ହୋଇଥିଲା । ସୌରଭଙ୍କ ଅଭିଯୋଗକୁ ଭିତ୍ତି କରି ପୋଲିସ ତଦନ୍ତ ଆରମ୍ଭ କରିଥିଲା ।
ସହରର ବିଭିନ୍ନ ସ୍ଥାନରୁ ମୋବାଇଲ ଲୁଟ୍ କରୁଥିବା 8 ଜଣିଆ ଗ୍ୟାଙ୍ଗକୁ ଧରିବାରେ ସଫଳ ହୋଇଛି ପୋଲିସ । ସେମାନଙ୍କ ନିକଟରୁ 39ଟି ଦାମୀ ମୋବାଇଲ ସହ 3 ଟି ବାଇକ ଜବତ କରାଯାଇଛି । ଲୁଟେରାମାନେ ଚାଲାକର ସହ ଦାମୀ ମୋବାଇଲକୁ ଲୁଟ୍ କରିବା ପରେ ସେହି ମୋବାଇଲକୁ ଦୋକାନୀ ସହାୟତାରେ ସଫ୍ଟୱେରକୁ ବଦଳାଇ ଦେଉଥିଲେ । ଯାହାଫଳରେ ଚୋରିକୁ ନେଇ ଥାନାରେ ଅଭିଯୋଗ ହେଲେ ମଧ୍ୟ ମୋବାଇଲ ଟ୍ରାକିଂ କରିବା ସମ୍ଭବ ହୋଇ ପାରୁନଥିଲା।
ଏହି ଲୁଟ ରାକେଟରେ ସମ୍ପୃକ୍ତ ଥିବା 3ଜଣ ମୋବାଇଲ ଦୋକାନୀଙ୍କୁ ମଧ୍ୟ ପୋଲିସ ଗିରଫ କରିଛି । ଲୁଟେରା ଗ୍ୟାଙ୍ଗକୁ ଧରିବା ପାଇଁ ସହଦେବ ଖୁଣ୍ଟା ଥାନା ଏସଆଇ ବିରଞ୍ଚି ସାହୁଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇଥିଲା । ପରେ ଏହି ଗ୍ୟାଙ୍ଗକୁ ଧରିବାରେ ପୋଲିସ ସଫଳ ହୋଇଛି । ଗିରଫ ସମସ୍ତ ଅଭିଯୁକ୍ତ ବାଲେଶ୍ୱର ସହର ଗଳାପୋଲ, ମିର୍ଜା ପୋଖରୀ ଅଞ୍ଚଳର ସୂଚନା ଦେଇଛି ପୋଲିସ ।
ବାଲେଶ୍ୱରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
