ବଲାଙ୍ଗୀର: କେନ୍ଦ୍ର କୃଷି ଆଇନକୁ ବିରୋଧ କରି ସଂଯୁକ୍ତ କୃଷକ ମୋର୍ଚ୍ଚା ଆସନ୍ତା 27 ତାରିଖ ଭାରତ ବନ୍ଦ ଡାକରା ଦେଇଛି । ତେବେ ଏହାକୁ ସମର୍ଥନ ଜଣାଇ ବଲାଙ୍ଗୀର ଓ ସୋନପୁର ଜିଲ୍ଲା ମଧ୍ୟ ବନ୍ଦ ରଖିବାର ନିଷ୍ପତ୍ତି ନେଇଛି କୃଷକ ସମନ୍ଵୟ ସମିତି ।
କେନ୍ଦ୍ର ସରକାରଙ୍କ ନୂଆ କୃଷି ଆଇନକୁ ବିରୋଧ କରି କିଛି କୃଷକ ସଂଗଠନ ଭାରତ ବନ୍ଦ ଡାକରା ଦେଇଛନ୍ତି । ତେବେ ଏହାକୁ ସମ୍ପୂର୍ଣ୍ଣ ସମର୍ଥନ ଦେଇ ଆସନ୍ତା 27 ତାରିଖରେ ବଲାଙ୍ଗୀର ଜିଲ୍ଲା ତଥା ସୁବର୍ଣ୍ଣପୁର ଜିଲ୍ଲାକୁ 12 ଘଣ୍ଟିଆ ବନ୍ଦ କରିବାର ନିଷ୍ପତ୍ତି ନେଇଛି ପଶ୍ଚିମ ଓଡ଼ିଶା କୃଷକ ସମନ୍ବୟ ସମିତି । ତେବେ ଏହି ବନ୍ଦ ପାଳନ ସମୟରେ ଜରୁରୀ ସେବା ଛାଡି ସବୁ ବନ୍ଦ ରହିବ ବୋଲି ସଂଗଠନ କହିଛି । ଯେଉଁଥିରେ ସ୍କୁଲ କଲେଜ, ସରକାରୀ ଓ ବେସରକାରୀ ଅନୁଷ୍ଠାନ, ଦୋକାନ ବଜାର ଓ ଗାଡ଼ି ଚଳାଚଳ ବନ୍ଦ କରାଯିବା ନେଇ ସଂଗଠନ ପକ୍ଷରୁ ସ୍ପଷ୍ଟ କରାଯାଇଛି ।
ନୂଆ କୃଷି ଆଇନକୁ ପ୍ରତ୍ୟାହାର ଦାବିରେ ଦିଲ୍ଲୀରେ ସଂଯୁକ୍ତ କୃଷକ ମୋର୍ଚ୍ଚା ଗତ 9 ମାସ ହେବ ଆନ୍ଦୋଳନ କରୁଛି। ଏହି ଦାବିକୁ ସମର୍ଥନ କରି ସୋନପୁର ବଲାଙ୍ଗୀର ଜିଲ୍ଲାର ବିଭିନ୍ନ କୃଷକ ସଂଗଠନମାନେ ମିଳିତ ଭାବରେ କୃଷକ ସମନ୍ଵୟ ସମିତି ଗଠନ କରିଛନ୍ତି ।
ବଲାଙ୍ଗୀରରୁ ଏସକେ ମହମ୍ମଦ ଓ୍ବାହିଦ, ଇଟିଭି ଭାରତ
