ବଲାଙ୍ଗୀର: ମର୍ମନ୍ତୁଦ ସଡକ ଦୁର୍ଘଟଣାରେ ଘଟଣାସ୍ଥଳରେ ଭାଇ ଭଉଣୀଙ୍କ ମୃତ୍ୟୁ ଅଭିଯୋଗ । ବଲାଙ୍ଗୀର ତୁଷୁରା ଠାରେ ଦୁର୍ଘଟଣାରେ ଆଜି ଭାଇ ଭଉଣୀଙ୍କ ମୃତ୍ୟୁ ଘଟିଛି । ବାଇକରେ ଭାଇ ଭଉଣୀ ଯାଉଥିବାବେଳେ ଏକ ଚାଉଳ ବୋଝେଇ ଟ୍ରକ୍ ସାମ୍ନାପଟୁ ଧକ୍କା ଦେଇଥିଲା ।
ସୂଚନା ଅନୁସାରେ, ଆଜି ସକାଳୁ ତୁରୁର ମହିପୂରରୁ ମୋଟର ସାଇକେଲରେ ଭାଇ-ଭଉଣୀ ତୁଷୁରା ସାଲେପାଲି ସ୍କୁଲକୁ ଭଉଣୀକୁ ଛାଡିବାକୁ ଯାଉଥିବାବେଳେ ଏହି ଦୁର୍ଘଟଣା ଘଟିଥିଲା । ବିପରୀତ ଦିଗରୁ ଆସୁଥିବା ଟ୍ରକ ତାଙ୍କୁ ଧକ୍କା ଦେବା ସହ କିଛି ଦୂରକୁ ଘୋଷାଡି ନେଇଥିଲା । ଫଳରେ ଘଟଣାସ୍ଥଳରେ ହିଁ ଭାଇ ଭଉଣୀଙ୍କ ମୃତ୍ୟୁ ଘଟିଛି ।
ମୃତକ ହେଲେ ବଲାଙ୍ଗୀର ମୁରିବହଲ ବ୍ଲକ ଅନତର୍ଗତ କୌମୁନିଆ ଗ୍ରାମର 21 ବର୍ଷୀୟ ପବନ ଗୁଣୀୟା ଓ ତାଙ୍କ 16 ବର୍ଷୀୟ ଭଉଣୀ ସଞ୍ଜୁ ଗୁନୀୟା ବୋଲି ଜଣାପଡିଛି । ସେପେଟେ ତୁଷୁରା ପୋଲିସ ମୃତଦେହ ଜବତ କରି ତଦନ୍ତ ଆରମ୍ଭ କରିଥିବା ବେଳେ ଦୁର୍ଘଟଣା ଘଟାଇଥିବା ଟ୍ରକକୁ ମଧ୍ୟ ଜବତ କରିଛି ।
ଜବତ ହୋଇଥିବା ଟ୍ରକଟି ସ୍ଥାନୀୟ ତୁଷୁରା କେଡିଆ ରାଇସ ମିଲର ବୋଲି ଜଣାପଡିଛି । ସେପଟେ କ୍ଷତିପୂରଣ ଦାବି କରି ଉତ୍ତ୍ୟକ୍ତଲୋକ ତୁଷୁରା ବଲାଙ୍ଗୀର ରାସ୍ତା ଦେଓଗାଁ ପଟୁ ଅବରୋଧ କରିଛନ୍ତି । ପୋଲିସ ଆନ୍ଦୋଳନକାରୀଙ୍କ ସହ ଆଲୋଚନା ଜାରି ରଖିଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
