ବଲାଙ୍ଗୀର: ଜଙ୍ଗଲ ଜମିରେ ରହୁଥିବା ଆଦିବାସୀଙ୍କ ଘର ଜୋର ଜବରଦସ୍ତ ଭାଙ୍ଗିଲେ ସରପଞ୍ଚ । ଜେସିବି ଲଗାଇ ଆଦିବାସୀଙ୍କ ଘର ଭାଙ୍ଗିଥିବା ନେଇ ଅଭିଯୋଗ ହୋଇଛି । ବଲାଙ୍ଗୀର ସାଲେଭାଟା ଗାଁ ନିକଟସ୍ଥ ଦୁଂଗୁରୀ ନିକଟ ଜଙ୍ଗଲ ଜମିରେ 14ଟି ଆଦିବାସୀ ପରିବାର ଦୀର୍ଘ ଦିନ ବସବାସ କରିଆସୁଥିଲେ । ସେଥି ମଧ୍ୟରୁ 5 ଜଣଙ୍କ ଆଦିବାସୀଙ୍କୁ ପ୍ରଧାନମନ୍ତ୍ରୀ ଆବାସ ଯୋଜାନାରେ ଘର କରିଥିଲେ । ହେଲେ ସ୍ଥାନୀୟ ସରପଞ୍ଚ ଏମାନଙ୍କୁ ଘର ଖାଲି ଅନ୍ୟତ୍ର ଯିବାକୁ କହିଥିଲେ । ଯାହା ଫଳରେ ସରପଞ୍ଚ ଜେସିବି ଲଗାଇ 5 ଟି ଘରକୁ ସମ୍ପୂର୍ଣ୍ଣ ନଷ୍ଟ କରିଦେଇଛନ୍ତି ।
ସେପଟେ, ସରପଞ୍ଚ ଘର ଭାଙ୍ଗିବା ପରେ ପୀଡିତ ପରିବାର ଏବେ ଖୋଲା ଆକାଶ ତଳେ ଆଶ୍ରୟ ନେଇଛନ୍ତି । ନ୍ୟାୟ ପାଇଁ ପୋଲିସର ଦ୍ବାରସ୍ଥ ହୋଇଛନ୍ତି । ଲୋଇସିଂହା ପୋଲିସ ଏହି ଘଟଣାରେ ତଦନ୍ତ କରି ସଂପୃକ୍ତ ଜେସିବିକୁ ଜବତ କରିବା ସହ ତଦନ୍ତ ଆରମ୍ଭ କରିଛି । ଅନ୍ୟପଟେ, ଆଦିବାସୀ ସଂଘ ଏହାକୁ ତ୍ରୀବ ନିନ୍ଦା କରିବା ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ନଚେତ ଆଗକୁ ତ୍ରୀବ ଆନ୍ଦୋଳନ ହେବ ବୋଲି ସଂଘ କହିଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
