ବଲାଙ୍ଗୀର: ଗତ 10 ତାରିଖରୁ ନିଖୋଜ ଥିବା କୃଷି ବ୍ୟାଙ୍କ ମେନେଜରଙ୍କ ମୃତଦେହ ନଦୀରୁ ଉଦ୍ଧାର ହୋଇଛି । ମୃତକ ଜଣକ ହେଉଛନ୍ତି ବଲାଙ୍ଗୀର ଜିଲ୍ଲା ଶାନ୍ତି ପଡ଼ାର ଦିବ୍ୟରଞ୍ଜନ ମିଶ୍ର । ମୃତ ଦିବ୍ୟରଞ୍ଜନ ବରଗଡ ଜିଲ୍ଲା ଅନ୍ତର୍ଗତ ପରପାଲି ଗ୍ରାମର ପଞ୍ଜାବ ନ୍ୟାସନାଲ ବ୍ୟାଙ୍କରେ କୃଷି ମ୍ୟାନେଜର ଭାବରେ କାର୍ଯ୍ୟରତ ଥିଲେ ।
ବ୍ୟାଙ୍କରୁ ଘରକୁ ଫେରିବା ବାଟରେ ବରଗଡ ବୋରିଗୁମ୍ମା 26 ନଂ ଜାତୀୟ ରାଜପଥ ସ୍ଥିତ ଚେରୁପାଲିଠାରୁ ଗତ 10 ତାରିଖରୁ ନିଖୋଜ ଥିଲେ। ଅଙ୍ଗ ନଦୀ ବ୍ରିଜ ଉପରୁ ତାଙ୍କର ବାଇକ ଓ ହେଲମେଟ ମିଳିଥିଲା, ମାତ୍ର ତାଙ୍କର କୌଣସି ପତ୍ତା ମିଲିନଥିଲା । ସେପଟେ ପରିବାର ଲୋକଙ୍କ ଅଭିଯୋଗ ପରେ ଅଗ୍ନିଶମ ପୋଲିସ ଓ ଓଡ୍ରାଫ ଟିମ ନଦୀରେ ଖୋଜାଖୋଜି କରି ବିଫଳ ହୋଇଥିଲେ । ତେବେ ଶନିବାର ତାଙ୍କର ମୃତଦେହ ଲଛିପୂର ଗ୍ରାମ ଅଙ୍ଗ ନଦୀ ତଟରୁ ଉଦ୍ଧାର କରାଯାଇଛି । ସେ ଆତ୍ମହତ୍ୟା କରିଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । ପୋଲିସ ତାଙ୍କ ବ୍ୟାଙ୍କ ଆକାଉଣ୍ଟ ଯାଞ୍ଚ କରିଥିବା ବେଳେ ସେ କୌଣସି ଏକ ଯୁବତୀ ଓ ଯୁବକଙ୍କୁ ଲକ୍ଷାଧିକ ଟଙ୍କା ପ୍ରଦାନ କରିଥିବାର ଜଣାପଡ଼ିଥିଲା । ଯାହାପରେ ଏହା ଏକ ସାଇବର କ୍ରାଇମ ଜାଲରେ ସେ ପଡିଥିବାର ସନ୍ଦେହ କରାଯାଉଛି । ତେବେ ପୋଲିସ ଘଟଣାର ତଦନ୍ତ କରୁଛି ।
ଇଟିଭି ଭାରତ, ବଲାଙ୍ଗୀର
