ବଲାଙ୍ଗୀର: ଜିଲ୍ଲାରେ ଦିନକୁ ଦିନ ବଢ଼ିଚାଲିଛି ଅପରାଧ । ପୋଲିସକୁ ଖୋଲା ଚ୍ୟାଲେଞ୍ଜ ଦେଇ ହତ୍ୟା, ଲୁଟରାଜ, ଦଙ୍ଗା ଭଳି କାଣ୍ଡ ଘଟାଇ ଚାଲିଛନ୍ତି। ପୋଲିସ ଏହାକୁ ପ୍ରତିହତ କରିବାକୁ ଲଗାତାର ପଦକ୍ଷେପ ମଧ୍ୟ ନେଉଛି । ଏହି ସମୟରେ ଜିଲ୍ଲାର କେତେକ ଦୁର୍ଦ୍ଦାନ୍ତ ଅପରାଧୀ ପୋଲିସ ହାବୁଡ଼ରେ ପଡୁଛନ୍ତି । ସହରର ଏକ ବଡ଼ ଡକାୟତ ଗ୍ୟାଙ୍ଗକୁ ଧରିବାରେ ସଫଳ ହୋଇଛି ବଲାଙ୍ଗୀର ପୋଲିସ ।
ସୂଚନା ଅନୁସାରେ ବଲାଙ୍ଗୀର ପୋଲିସ ବିଶ୍ୱସ୍ତ ସୂତ୍ରରୁ ଖବର ପାଇ ବିଷ୍ଣୁମୁଣ୍ଡାରେ ଚଢ଼ାଉ କରିଥିଲା । ସେଠାରେ ଡକାୟତି ଯୋଜନା କରୁଥିବା ଏକ ବଡ ଗ୍ୟାଙ୍ଗକୁ ପୋଲିସ ଧରିବାରେ ସଫଳ ହୋଇଛି । ଏହି ଘଟଣାରେ 6 ଜଣ ଗିରଫ ହୋଇଥିବାବେଳେ ସେମାନେ ଏକାଧିକ ଅପରାଧିକ ମାମଲାରେ ସମ୍ପୃକ୍ତ ଥିବା ପୋଲିସ ସୂଚନା ଦେଇଛି । ଗିରଫ ଅଭିଯୁକ୍ତ ବଲାଙ୍ଗୀର ବିଷ୍ଣୁ ମୁଣ୍ଡାର ଶ୍ରୀକାନ୍ତ ସୁନା, ନିତେଇ ନନ୍ଦ, ସୁମନ ବାଗ ଓ ସୁଦାମ ସୁନା, ସେହିପରି ବଲାଙ୍ଗୀର ମାଲ ଗୋଦାମ ପଡାର ଧନେଶ୍ୱର ନାଗ ଓ ତେଜେରାଜ ନନ୍ଦକୁ ପୋଲିସ ଗିରଫ କରିଛି । ଏମାନଙ୍କ ଠାରୁ ଗୋଟିଏ ଖଣ୍ଡା, ଭୁଜାଲି, ମୋଟର ସାଇକେଲ ଓ ଏକ ବନ୍ଧୁକ ଜବତ ହୋଇଛି । ଏଥିସହ 6ଟି ମୋବାଇଲ ଏବଂ ତିନୋଟି ବାଇକ ମଧ୍ୟ ପୋଲିସ ଜବତ କରିଛି ।
ଏହା ମଧ୍ୟ ପଢ଼ନ୍ତୁ: ଆକାଶ ଦୋଳିରୁ ଖସି ଯୁବକଙ୍କ ମୃତ୍ୟୁ, ଚାଲିଗଲା ପରିବାର ଏକ ମାତ୍ର ରୋଜଗାରିଆ
ଏନେଇ ବଲାଙ୍ଗୀର ଥାନା ଏସଡିପିଓ କହିଛନ୍ତି, " ଗିରଫ ଅଭିଯୁକ୍ତଙ୍କ ନାଁରେ ପୂର୍ବରୁ ହତ୍ୟା ଉଦ୍ୟମ, ଲୁଟ, ଡକାୟତି ଭଳି ବିଭିନ୍ନ ମାମଲା ରହିଛି। ଏମାନେ ପେଷାଦାର ଅପରାଧ କରୁଥିବାବେଳେ ନିଜ ଫେସବୁକରେ ମଧ୍ୟ ବନ୍ଧୁକ ପିସ୍ତଲ ଓ ଖଣ୍ଡା ଇତ୍ୟାଦି ଧରି ଫୋଟୋ ଛାଡି ଲୋକଙ୍କୁ ଭୟଭୀତ କରୁଛନ୍ତି।" ଏମାନଙ୍କୁ ଗିରଫ କରି ସହର ମଧ୍ୟରେ ଘଟାଇଥିବା ଅପରାଧର ସିନ ରିକ୍ରିଏସନ ହୋଇଛି ଏବଂ ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଏସଡିପିଓ ସୂଚନା ଦେଇଛନ୍ତି।
ଇଟିଭି ଭାରତ, ବଲାଙ୍ଗୀର
