ଫିଲ୍ମରେ କାମ ଦେବା ନାଁରେ ଠକେଇ, ଯୁବକଙ୍କଠୁ ଲୁଟିଲେ ୭୭ ହଜାର

ବଲିଉଡ ସିନେମାରେ କାମ ନାଁରେ ଟଙ୍କା ଠକେଇ ଅଭିଯୋଗ। ଠକେଇର ଶିକାର ହେଲେ ବଲାଙ୍ଗୀରର ଯୁବକ । ଅଧିକ ପଢନ୍ତୁ

ବଲାଙ୍ଗୀର: ସିନେମାରେ କାମ ଦେବା ଆଳରେ ମୋହରା । ବଲିଉଡ ସିନେମାରେ ଅଭିନୟ କରିବାର ଆଶା ଦେଇ ଠକି ଦେଲେ ନିର୍ଦ୍ଦେଶକ । ଟିଭି, ସିନେମା ଓ ବିଜ୍ଞାପନରେ କାମ ଦେବା କହି ଲୁଟିନେଲେ ଲକ୍ଷାଧିକ ଟଙ୍କା । ୪୭ ଜଣଙ୍କ ଠାରୁ ଟଙ୍କା ଠକି ଫେରାଇବାକୁ ଅମଙ୍ଗ ବଲିଉଡ ଫିଲ୍ମ ନିର୍ଦ୍ଦେଶକ ସଞ୍ଜୟ ମିଶ୍ର । ଏହି ଠକାମିର ଶିକାର ହୋଇଛନ୍ତି ବଲାଙ୍ଗୀର ଯୁବକ ସୁଦାମ ଚରଣ ସିଂହ । ସିନେମାନରେ ଅଭିନୟ ପାଇଁ ୭୭ ହଜାର ଟଙ୍କା ଦେଇ ଠକାମିର ଶିକାର ହୋଇଛନ୍ତି ଯୁବକ ଜଣଙ୍କ । ଏନେଇ ସେ ଥାନାରେ ଅଭିଯୋଗ କରିଛନ୍ତି ।

ଷ୍ଟାର ବନିବାକୁ ମୁମ୍ବାଇ ଯାଇଥିଲେ ସୁଦାମ ଚରଣ ସିଂହ । ଅଭିନୟ ତାଙ୍କର ନିଶା ହୋଇଥିବାବେଳେ, ସେ ସିନେମା ଟିଭିରେ ଅଭିନୟ କରିବା ପାଇଁ ଆଶା ବାନ୍ଧିଥିଲେ। ଏବଂ ଏଥିପାଇଁ ସେ ମୁମ୍ବାଇର ଏକ ଅଭିନୟ ଟ୍ରେନିଂ ସେଣ୍ଟରରେ ନାମ ଲେଖାଇ ଅଭିନୟ ଶିଖିଥିଲେ । ଏହାରି ମଧ୍ୟରେ ତାଙ୍କର ପରିଚୟ ସେଠି ଜଣେ ମହିଳା ସୁଦ୍ଧା ଚତୁର୍ବେଦୀଙ୍କ ସହ ହୋଇଥିଲା । ଏହାପରେ ମହିଳା ଜଣକ ବଲିଉଡର ଜଣେ ନିର୍ଦ୍ଦେଶକ କୁହାଯାଉଥିବା ସଞ୍ଜୟ ମିଶ୍ରଙ୍କ ସହିତ ତାଙ୍କର ପରିଚୟ କରାଇଥିଲେ ।

ତେବେ ବଲାଙ୍ଗୀରର ସୁଦାମକୁ ଟିଭି ସିନେମା କିମ୍ବା ବିଜ୍ଞାପନରେ ଅଭିନୟ କରିବା ପାଇଁ ସେ ସୁଯୋଗ ଦେବେ ଏବଂ ଏଥିପାଇଁ ତାଙ୍କଠୁ ସେ ବିଭିନ୍ନ କିସ୍ତିରେ ୭୭ ହଜାର ଟଙ୍କା ନେଇଥିଲେ । ତେବେ ସେ ଓ ଅନ୍ୟ ୪୬ ଜଣ ମଧ୍ୟ ଏହିଭଳି ଲକ୍ଷାଧିକ ଟଙ୍କା ତାଙ୍କୁ ଦେଇଥିଲେ । ହେଲେ ବର୍ଷ ପରେ ବର୍ଷ ବିତି ଯିବା ସତ୍ତ୍ବେ ଟଙ୍କା ନେଇଥିବା ସଞ୍ଜୟ ମିଶ୍ର ଆଉ ଧରାଛୁଆଁ ଦେଇ ନଥିଲେ । ଓଲଟା ଫୋନରେ ଟଙ୍କା ଫେରାଇବାକୁ ମନା କରିବା ସହ ଅଭିଯୋଗ କଲେ ଜୀବନରୁ ମାରି ଦେବାର ଧମକ ଦେଇଥିବାର ଯୁବକ ଜଣକ ଅଭିଯୋଗ କରିଛନ୍ତି । ଏବଂ ବଲାଙ୍ଗୀର ସାଇବର ଥାନାରେ ଏହାର ଲିଖିତ ଅଭିଯୋଗ କରି ଉଚିତ ନ୍ୟାୟ ଦାବି କରିଛନ୍ତି।

ଇଟିଭି ଭାରତ, ବଲାଙ୍ଗୀର