ବଲାଙ୍ଗୀର: ନେତା ଓ ପୋଲିସ ପ୍ରଶାସନ ମଧ୍ୟରେ ବାକ୍ଯୁଦ୍ଧ ବଲାଙ୍ଗୀରରେ ଚର୍ଚ୍ଚାର ବିଷୟ ପାଲଟିଛି । ଅନେକ ସମୟରେ ଜନ ପ୍ରତିନିଧି ଓ ନେତା ପ୍ରଶାସନିକ ଅଧିକାରୀ ଓ ପୋଲିସ ଅଧିକାରୀଙ୍କୁ ଘେରୁଛନ୍ତି । ଏହି କ୍ରମରେ ଏବେ ପୁଣିଥରେ ବଲାଙ୍ଗୀର ବିଜେପିର ବରିଷ୍ଠ ନେତା କନକ ବର୍ଦ୍ଧନ ସିଂହଦେଓ ଏବଂ ବଲାଙ୍ଗୀର ଏସ୍ପି ନୀତିନ କୁଶଲକର ମୁହାଁମୁହିଁ ହୋଇଛନ୍ତି । ଯାହାର ଭିଡିଓ ଭାଇରାଲ ହେଉଥିବାବେଳେ ବଲାଙ୍ଗୀରରେ ବାରମ୍ବାର ପ୍ରଶାସନିକ ଅଧିକାରୀ ଓ ନେତା ମୁହାଁମୁହିଁ ହେବା ଘଟଣା ପୁଣି ଚର୍ଚ୍ଚାକୁ ଆସିଛି ।
ସୂଚନା ଅନୁସାରେ ବଲାଙ୍ଗୀର ଜିଲ୍ଲାରେ ବିପର୍ଯ୍ୟସ୍ତ ଆଇନ ଶୃଙ୍ଖଳା ବ୍ୟବସ୍ଥାକୁ ବିରୋଧ କରି ବିଜେପି ନେତା କେଭି ସିଂହଦେଓ ପାଟଣାଗଡ଼ ଥାନା ଓ ଏସ୍ଡିପିଓଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ । ଧାରଣାର ୩୬ ଘଣ୍ଟା ପରେ ବଲାଙ୍ଗୀର ଏସ୍ପି ତାଙ୍କ ସହ ଆଲୋଚନା କରିବାକୁ ପହଞ୍ଚିଥିଲେ । ଯାହାକୁ ନେଇ କେଭି ସିଂହଦେଓ ଏସ୍ପିଙ୍କ ଉପରେ କ୍ଷୁବ୍ଧ ହୋଇଥିଲେ । ତାଙ୍କ ବିଭାଗ ସଠିକ୍ କାମ କରୁନଥିବାବେଳେ ପୋଲିସ୍ ବର୍ଦ୍ଦିକୁ ସମ୍ମାନ ଦେଉ ନଥିବାର କହିଥିଲେ । ଯାହା ପରେ ଏସ୍ପି ନୀତିନ କୁଶଲକର ତାଙ୍କ ଏହି କଥାକୁ ନେଇ ଆପତ୍ତି ଉଠାଇଥିଲେ । କେଭି ସିଂହଦେଓ ତାଙ୍କ ଉପରେ ବର୍ଷିଥିଲେ ଏବଂ ଆଇନ ଶୃଙ୍ଖଳା ବ୍ୟବସ୍ଥାକୁ ନେଇ ପ୍ରଶ୍ନ କରିଥିଲେ । ଯେଉଁଥିରେ ପାଟଣାଗଡ଼ ଓ ବଲାଙ୍ଗୀରରେ ଘଟିଥିବା ଘଟଣା ଓ ହତ୍ୟାକାଣ୍ଡ ଉପରେ ସେ ଏସ୍ପିଙ୍କ ଜବାବ ତଲବ କରିଥିଲେ ।
