ବଲାଙ୍ଗୀର: ମର୍ଣ୍ଣିଂ ୱାକ୍ ପାଇଁ ଯାଉଥିବା ସମୟରେ ଦୁଇ ମହିଳାଙ୍କ ଉପରେ ମାଡିଗଲା ପିକଅପ୍ ଭ୍ୟାନ । ଘଟଣାସ୍ଥଳରେ ଜଣେ ମହିଳାଙ୍କ ମୃତ୍ୟୁ ଘଟି ଥିବାବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ଘଟଣାସ୍ଥଳରେ ସ୍ଥାନୀୟ ଲୋକଙ୍କ ପ୍ରବଳ ଉତ୍ତେଜନା ।
ବଲାଙ୍ଗୀର ମହାଦେବ ମନ୍ଦିର ନିକଟ ରାସ୍ତାରେ ଦୁଇ ମହିଳା ପ୍ରାତଃ ଭ୍ରମଣ ପାଇଁ ବାହାରିଥିଲେ । ଏହି ସମୟରେ ଏକ ପରିବା ବୋଝେଇ ପିକଅପ୍ ଭ୍ୟାନ୍ ଦୁଇ ମହିଳାଙ୍କୁ ପଛପଟୁ ଧକ୍କା ଦେଇ ଓଲଟି ପଡିଥିଲା । ଖବର ପାଇ ପୋଲିସ୍ ଓ ସ୍ଥାନୀୟ ବାସିନ୍ଦା ବହୁ ଚେଷ୍ଟା ପରେ ମହିଳାଙ୍କୁ ଉଦ୍ଧାର କରିଥିଲେ । ତେବେ ଏଥିରେ ଘଟଣାସ୍ଥଳରେ ଜଣେ ମହିଳାଙ୍କ ମୃତ୍ୟୁ ଘଟିଥିବାବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ତାଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଘଟଣା ପରେ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ଦେଖା ଦେଇଥିଲା । ପୋଲିସ୍ ଲୋକଙ୍କ ସହ ଆଲୋଚନା ପରେ ତଥା ଦୁର୍ଘଟଣା ଘଟାଇ ଥିବା ଡ୍ରାଇଭରକୁ ଗିରଫ କରିବା ପରେ ରାସ୍ତାରୋକ ହଟିଥିଲା ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
