ଅନୁଗୁଳ: ଜିଲ୍ଲାରେ ଶନିବାର ଚିହ୍ନଟ ହୋଇଛି 10ଟି ନୂଆ ମାମଲା । ଏଥିସହ ଜିଲ୍ଲାରେ ମୋଟ ଆକ୍ରାନ୍ତ ସଂଖ୍ୟା 106ରେ ପହଞ୍ଚିଛି । ତେବେ ସଦ୍ୟ ଚିହ୍ନଟ ଆକ୍ରାନ୍ତଙ୍କ ମଧ୍ୟରେ ଦୁଇଟି ପୃଥକ ପୃଥକ ଶିଳ୍ପ ସଂସ୍ଥାରୁ 7 ଜଣ ଆକ୍ରାନ୍ତ ଚିହ୍ନଟ ହୋଇଥିବା ଜଣାପଡିଛି । ଏନେଇ ଲୋକ ସମ୍ପର୍କ ବିଭାଗ ପକ୍ଷରୁ ସୂଚନା ଦିଆଯାଇଛି । ଅନ୍ୟପଟେ ବଳକା ତିନି ଜଣଙ୍କ ମଧ୍ୟରୁ ଦୁଇ ଜଣ ସଙ୍ଗରୋଧ କେନ୍ଦ୍ରରୁ ହୋଇଥିବା ବେଳେ ଜଣେ ସ୍ଥାନୀୟ ବାସିନ୍ଦା ରହିଛନ୍ତି ।
ସୂଚନା ମୁତାବକ ଶିଳ୍ପ ସଂସ୍ଥାରୁ ଚିହ୍ନଟ 7 ଜଣଙ୍କ ମଧ୍ୟରୁ ଜଣେ ମହିଳାଙ୍କ ସମେତ 6 ଜଣ ବଅଁରପାଳ ଅଞ୍ଚଳରେ ଥିବା ବୃହତ ଉଦ୍ୟୋଗର ଓ ଜଣେ କଣିହାଁଠାରେ ଥିବା ଶିଳ୍ପ ସଂସ୍ଥାର ହୋଇଥିବା ସ୍ପଷ୍ଟ ହୋଇଛି । ଏନେଇ ପ୍ରେସ ବିଜ୍ଞପ୍ତିରେ ପ୍ରକାଶ କରାଯାଇଛି । ସେହିପରି ଜିଲ୍ଲାରେ ବର୍ତ୍ତମାନ ସୁଦ୍ଧା 60 ଜଣ ସୁସ୍ଥ ହୋଇସାରିଥିବା ରେକର୍ଡ ରହିଛି । ଅନ୍ୟପଟେ ଚିକିତ୍ସା ପାଇଁ ସମସ୍ତ ଆକ୍ରାନ୍ତଙ୍କୁ ତାଳଚେର କୋଭିଡ-19 ହସ୍ପିଟାଲରେ ଭର୍ତ୍ତି କରାଯାଇଛି ।
ଅନୁଗୁଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
