ଅନୁଗୋଳ: ଦେଶର ଆନ୍ତଃରାଜ୍ୟ ବ୍ୟାଘ୍ର ସ୍ଥାନାନ୍ତରଣ ପ୍ରକଳ୍ପକୁ ଜାତୀୟ ବ୍ୟାଘ୍ର ସଂରକ୍ଷଣ ସଂସ୍ଥା (NTCA) ପ୍ରଥମେ ରୋକ ଲଗାଇବା ପରେ ମଧ୍ୟପ୍ରଦେଶରୁ ଆସିଥିବା ବାଘୁଣୀକୁ ଫେରାଇ ଦେବାକୁ ଓଡିଶା ସରକାରଙ୍କ ନିକଟକୁ ଚିଠି ଲେଖିଥିଲେ । ଆଜି ସେହି ଚିଠିର ଉତ୍ତର ରଖିଛନ୍ତି ରାଜ୍ୟ ସରକାର । ବାଘୁଣୀକୁ ଫେରାଇ ନେବାକୁ ମଧ୍ୟ ପ୍ରଦେଶ ସରକାରଙ୍କୁ ଚିଠି ଲେଖିଛି ଓଡିଶା ବନ ବିଭାଗ ।
ଏକ ବର୍ଷରୁ ଅଧିକ ଦିନ ହେବ ସାତକୋଶିଆର ଏନକ୍ଲୋଜରରେ ମଣିଷ ମାରିବା ଅଭିଯୋଗରେ ବନ୍ଦୀ ଜୀବନ କାଟୁଛି ବାନ୍ଧବ ଗଡର ବାଘୁଣୀ । ବନ ବିଭାଗ ସୂଚନା ମୁତବକ ମଧ୍ୟପ୍ରଦେଶ ସରକାର ଓ ବ୍ୟାଘ୍ର ପ୍ରକଳ୍ପ କର୍ତ୍ତୃପକ୍ଷଙ୍କୁ ବାଘୁଣୀକୁ ଫେରାଇ ନେବା ଲାଗି ଏହି ଚିଠିରେ କୁହାଯାଇଛି । ଯେଉଁ ବିଶେଷଜ୍ଞମାନଙ୍କ ସହାୟତାରେ ଏଠାକୁ ବାଘୁଣୀକୁ ଅଣାଯାଇଥିଲା, ସେମାନେ ହିଁ ଏଠାରୁ ବାଘୁଣୀକୁ ଫେରାଇ ନିଆଯାଉ ବୋଲି କୁହାଯାଇଛି ।
୨୦୧୯ ଡିସେମ୍ବର ୧୭ ତାରିଖରେ NTCA ର DIG ସୁରେନ୍ଦ୍ର ମେହେରା ଚିଠି ଲେଖି ବ୍ୟାଘ୍ର ସମ୍ପ୍ରସାରଣ ତଥା ସୁରକ୍ଷା ପ୍ରତି ରାଜ୍ୟ ସରକାରଙ୍କ ଆନ୍ତରିକତା ଉପରେ ପ୍ରଶ୍ନ ଉଠାଇଥିଲେ । ମୁଖ୍ୟ ଶାସନ ସଚିବଙ୍କୁ ଚିଠି ଲେଖି ମଧ୍ୟପ୍ରଦେଶରୁ ସାତକୋଶିଆକୁ ଆସିଥିବା ବାଘ (ଟି-୧) ଓ ବାଘୁଣୀ (ଟି-୨) ଙ୍କ ପରିଚାଳନା ଦିଗରେ ଆବଶ୍ୟକ ପଦକ୍ଷେପ ନିଆଯାଇ ନଥିଲା। ଏପରିକି ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର(ଏସ୍ଓପି) ପାଳନ କରାଯାଇ ନଥିଲା ।
ଏନେଇ ଏନ୍ଟିସିଏ ପକ୍ଷରୁ ବାରମ୍ବାର ରାଜ୍ୟ ଜଙ୍ଗଲ ବିଭାଗକୁ ଅବଗତ କରାଯାଇଥିଲେ ମଧ୍ୟ କୌଣସି ପଦକ୍ଷେପ ବିଭାଗ ନେଇ ନଥିବା NTCA ପ୍ରଶ୍ନ କରିଥିଲା । ବାଘୁଣୀକୁ ବାନ୍ଧବଗଡ଼ରୁ ସାତକୋଶିଆକୁ ଆଣିବା ସମୟରେ ବନ୍ୟପ୍ରାଣୀ ସୁରକ୍ଷା ଆଇନ ୧୯୭୨କୁ ପାଳନ କରାଯାଇ ନଥିବା ଚିଠିରେ ଦର୍ଶା ଯାଇଥିଲା । ତେବେ ବାଘୁଣୀକୁ ମଧ୍ୟପ୍ରଦେଶର କାହ୍ନା ଟାଇଗର ରିଜର୍ଭରେ ଥିବା ଘୋରେଲା କେନ୍ଦ୍ରକୁ ପ୍ରତ୍ୟାହାର କରି ନିଆଯିବ ବୋଲି କୁହାଯାଉଛି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ,ଇଟିଭି ଭାରତ
