ଅନୁଗୋଳ: ପୋଲିସ ବାବୁଙ୍କ ରଙ୍ଗିଲା ମିଜାଜ୍, ରାତି ଅଧରେ ପଶିଲେ ମହିଳାଙ୍କ ଘରେ । ‘ଚେୟାରରେ ନବସି ବସିଲେ ଖଟରେ । କହିଲେ ଯଦି ଦବ ରହିବି ନହେଲେ ପଳେଇବି’ । ରାତି ଅଧରେ ଜଣେ ମହିଳାଙ୍କ ଘରେ ପଶି ଏଭଳି ଅଶ୍ଲୀଳ ଇଙ୍ଗିତ କରିଥିଲେ ଖାକିରେ ଥିବା ପୋଲିସ ବାବୁ । ଏକଥା ଆମେ କହୁନୁ ଭାଇରାଲ ହୋଇଥିବା ଏକ ଭିଡିଓ ହିଁ ଦର୍ଶାଉଛି । ତେବେ ଭିଡିଓ ଭାଇରାଲ ହେବା ପରେ ପୋଲିସ ବାବୁଙ୍କୁ ଗିରଫ କରାଯାଇଛି ।
ଭାଇରାଲ ହୋଇଥିବା ଭିଡିଓରେ ଜଣେ ପୋଲିସ ଅଧିକାରୀ ପୋଲିସ ପୋଷାକରେ ଥିବା ବେଳେ, ଏହାରର ଭିଡିଓ ଜଣେ ମହିଳା ଉତ୍ତୋଳନ କରୁଥବା ସ୍ପଷ୍ଟ ବାରି ହୋଇ ପଡୁଛି । ଭିଡିଓରେ ଦେଖିବାକୁ ମିଳିଛି ଯେ, ପୋଲିସ ବାବୁ ମହିଳାଙ୍କ ଘରେ ରାତି ଅଧରେ ପଶିବା ସହ ତାଙ୍କ ଶୋଇବା ଘର ଭିତରରୁ ଯାଉଛନ୍ତି, ଏଥି ସହ ଚେୟାରରେ ବସିବା ବଦଳରେ ଖଟରେ ବସୁଛନ୍ତି ଏବଂ ମହିଳା ଜଣଙ୍କୁ ଅଶ୍ଲିଳ ଇଙ୍ଗିତ କରୁଛନ୍ତି । ଏହି ସମୟରେ ମହିଳା ଜଣଙ୍କ ଏହାର ଭିଡିଓ ଉତ୍ତୋଳନ କରୁଛନ୍ତି । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଭାଇରାଲ ହୋଇଥିବା ଏହି ଭିଡିଓ ହେଉଛି ଅନୁଗୋଳ ଜିଲ୍ଲାର । ଭିଡିଓରେ ଥିବା ଏହି ବାବୁ ଜଣଙ୍କ ହେଉଛନ୍ତି ତାଳଚେର ଥାନା ଅଧୀନରେ ସ୍ବତନ୍ତ୍ର ପୋଲିସ ଅଧିକାରୀ ଭାବେ ନିଯୁକ୍ତି ପାଇଥିବା ନୀଳମଣି ମହାନ୍ତି । ଯିଏକି ହାଇୱେ ପାଟ୍ରୋଲିଂ ଦାୟିତ୍ବରେ ଥିଲେ । ହେଲେ ବାବୁ ଜଣଙ୍କ ପାଟ୍ରୋଲିଂ ଛାଡି ରାତିରେ ମହିଳାଙ୍କ ଘର କବାଟ ବାଡଉଛନ୍ତି ।
ଏହି ଘଟଣାଟି ଥିଲା ଗତ ଅଗଷ୍ଟ 23 ତାରିଖ ରାତି ପ୍ରାୟ 3.30 ମିନିଟ୍ର । ଏହି ଘଟଣା ପରେ ମହିଳା ଜଣଙ୍କ ତାଳଚେର ଥାନାରେ ଲିଖିତ ଅଭିଯୋଗ କରିଥିଲେ । ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା । ଅଭିଯୁକ୍ତ ପୁଲିସ ଅଧିକାରୀଙ୍କ ବିରୋଧରେ ପ୍ରମାଣ ଥିବାରୁ ତାଙ୍କ ବିରୋଧରେ ଆଇପିସିର ୪୫୪/୩୭୬/୩୨୩/୫୧୧/୫୦୬ ଦଫାରେ ମାମଲା ରୁଜୁ କରି ଗିରଫ କରା ଯାଇଥିବା ଜଣା ପଡିଛି । ସେହିପରି ତାଳଚେରର ଆଉ ଜଣେ କନେଷ୍ଟବଳ ମଧ୍ୟ ଏହି ମହିଳାଙ୍କୁ ଦୁଷ୍କର୍ମ ଉଦ୍ୟମ କରି ମଧ୍ୟ ଗିରଫ ହୋଇଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
