ଅନୁଗୋଳ: କୋଇଲା ଖଣି ସମ୍ପ୍ରସାରଣ ପାଇଁ ଉଚ୍ଛେଦ ବେଳେ ଉତ୍ତେଜନା । ଗ୍ରାମବାସୀ ଓ ପୋଲିସ ମୁହାଁମୁହିଁ । ମଙ୍ଗଳବାର ଏଭଳି ସ୍ଥିତି ଲାଗି ରହିଥିଲା ତାଳଚେର ହିଙ୍ଗୁଳା କୋଇଲା ଖଣି ଅଞ୍ଚଳରେ । ଏହି ଖଣିର ସମ୍ପ୍ରସାରଣ ପାଇଁ ଭାଲୁଗାଡ଼ିଆ ଗାଁର ନାଏକ ସାହିର ପ୍ରାୟ ୪୦ ପରିବାର ଘର ଭାଙ୍ଗିବା ପାଇଁ MCL ମେସିନ ନେଇ ପହଞ୍ଚିଥିଲା। ସାଙ୍ଗରେ ଥିଲେ ଜିଲ୍ଲା ଏସପିଙ୍କ ସହ ଶହ ଶହ ପୋଲିସ, ତାଳଚେର ଉପଜିଲ୍ଲାପାଳ ଓ ମାଜିଷ୍ଟ୍ରେଟ । ଗାଁ ଲୋକେ ଉଚ୍ଛେଦକୁ ବିରୋଧ କରିବାରୁ ମୁହାଁମୁହିଁ ପରିସ୍ଥିତି ଉପୁଜିଥିଲା।
ତାଳଚେର ବିଧାୟକ ବ୍ରଜ କିଶୋର ପ୍ରଧାନ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ । ପ୍ରତ୍ୟେକ ପରିବାରକୁ 16ଲକ୍ଷ ଟଙ୍କା, ନିଯୁକ୍ତି ଓ ରହିବା ପାଇଁ ଘର ଯୋଗାଇ ଦେଲେ ଜାଗା ଛାଡ଼ିବେ ବୋଲି ଜିଦ୍ ଧରି ବସିଥିଲେ । ଯାହାକୁ ନେଇ ବିଗିଡିଥିଲା ପରିସ୍ଥିତି । MCL ମନମୁଖୀ ଭାବେ ଲୋକଙ୍କ ଉପରେ ଦାଉ ସାଜୁଥିବା ବିଧାୟକ ଅଭିଯୋଗ କରିଥିଲେ । ଏହି ସବୁ ପରେ ବି ଆନ୍ଦୋଳନକାରୀଙ୍କୁ ଗିରଫ କରିଥିଲା ପୋଲିସ।
ଏହାପରେ ଭାଲୁଗାଡ଼ିଆ ନାଏକ ସାହିକୁ ପୋଲିସ ଘେରାବନ୍ଦି କରି ଘର ଭାଙ୍ଗିଛି । ଅନ୍ୟପଟେ ପୋଲିସ ଗିରଫ ଦାରିକୁ ବିରୋଧ କରି ତାଳଚେର ଅଞ୍ଚଳର ବହୁ ଶ୍ରମିକ ଓ ଅନ୍ୟାନ୍ୟ ସଙ୍ଗଠନ ସମସ୍ତ କୋଇଲା ଖଣିକୁ ବନ୍ଦ କରି ଦେଇଛନ୍ତି । ସମସ୍ତ ଖଣିରୁ କୋଇଲା ଉତ୍ତୋଳନ ଓ ପରିବହନ ବାଧାପ୍ରାପ୍ତ ହୋଇଛି । ଏପଟେ ଏପରି ପରିସ୍ଥିତିକୁ ନେଇ ଅଡ଼ୁଆରେ ପଡି ଯାଇଛନ୍ତି MCL କର୍ତ୍ତୃପକ୍ଷ , ପୋଲିସ ଏବଂ ଜିଲ୍ଲା ପ୍ରଶାସନ । ତେବେ କ୍ଷତିଗ୍ରସ୍ତଙ୍କୁ ଆଇନ ଅନୁଯାୟୀ କ୍ଷତିପୂରଣ ଦିଆଯିବ ବୋଲି MCL କର୍ତ୍ତୃପକ୍ଷ କହିଛନ୍ତି।
ଅନୁଗୋଳରୁ ସଂଗ୍ରାମରଞ୍ଜନ ନାଥ ଇଟିଭି ଭାରତ
