ଅନୁଗୋଳ: କୋରୋନା ମହାମାରୀ ମୁକାବିଲା ପାଇଁ ସରକାର ଅନେକ ପଦକ୍ଷେପ ନେଉଛନ୍ତି । ରାଜ୍ୟରେ କୋରୋନା ସଂକ୍ରମଣ ଅନିୟନ୍ତ୍ରିତ ଭାବରେ ବଢ଼ି ଚାଲିଛି । ଏଭଳି ସ୍ଥିତିରେ ରାଜ୍ୟର ଅନେକ ଟୀକାକରଣ କେନ୍ଦ୍ର ଗୁଡ଼ିକରେ ଲୋକଙ୍କ ନାହିଁ ନଥିବା ଭିଡ଼ ଦେଖିବାକୁ ମିଳୁଛି । ଏହି ଭିଡ଼ ଏଡ଼ାଇବା ସହ କୋରୋନା ସଂକ୍ରମଣରୁ ବର୍ତ୍ତିବାରୁ ଲୋକେ ଅନୁଗୋଳ ଜିଲ୍ଲା କୋଶଳା ସ୍ବାସ୍ଥ୍ୟ କେନ୍ଦ୍ରରେ ଦେଖିବାକୁ ମିଳିଛି ଏକ ଅଭିନବ ଉପାୟ ।
କୋରୋନା ଯାଞ୍ଚ କରାଇବାକୁ ଆସିଥିବା ଲୋକେ ଧାଡ଼ିରେ ଛିଡ଼ା ହେବା ବଦଳରେ ସାଥିରେ ଆଣିଥିବା ଆଧାର କାର୍ଡ ଧାଡ଼ିରେ ରଖିଥିବା ଦେଖିବାକୁ ମିଳିଛି । ଏଥିପାଇଁ ଏବେ ଟେଷ୍ଟିଂକୁ ଯେତିକି ଗୁରୁତ୍ବ ଦିଆଯାଉଛି ଟୀକାକରଣ ଉପରେ ବି ସେତିକି ଗୁରୁତ୍ବ ଦିଆଯାଉଛି । ଏହି ଅଭିନବ ଉପାୟରେ ଧାଡ଼ି କଲାବେଳେ ଆଧାର କାର୍ଡ ଯେପରି ପବନରେ ଉଡ଼ି ନଯିବ ସେଥିପାଇଁ ତା’ଉପରେ ଛୋଟ ଛୋଟ ପଥର ରଖି ଦେଇଥିବା ଦେଖିବାକୁ ମିଳିଛି ।
ଖାଲି ସେତିକି ନୁହେଁ କେହି କେହି ନିଜ ବ୍ୟାଗକୁ ଧାଡ଼ିରେ ରଖିଥିଲେ । ଯାହାର ଭିଡିଓ ଭାଇରାଲ ହେବାରେ ଲାଗିଛି । ତେବେ ଡେରିରେ ଟେଷ୍ଟିଂ ହେଉଥିବାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଯାଇଛି । କୋରୋନା ଟେଷ୍ଟ ପାଇଁ ସକାଳ ୯ଟା ବେଳେ ଆରମ୍ଭ ହେଉଥିବା ବେଳେ ରାତି ୪ ଟାରୁ ଲୋକ ଆସି ଜଗି ରହୁଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
