ଅନୁଗୋଳ: ଗଣେଶ ପୂଜା ପାଇଁ ଝଲସୁଛି କଳା ହୀରାର ସହର ତାଳଚେର । ରାସ୍ତାରୁ ଆରମ୍ଭ କରି ଦୋକାନ ବଜାର ସବୁଠି ରଙ୍ଗୀନ ଆଲୋକ । ଗଣେଶ ପୂଜା ପାଇଁ ଉତ୍ସବ ମୁଖର ହୋଇଉଠିଛି ସହରଠୁ ପୁରପଲ୍ଲୀ । ବିଭିନ୍ନ ପୂଜା କମିଟି ପକ୍ଷରୁ ଶ୍ରଦ୍ଧାଳୁଙ୍କୁ ଆକୃଷ୍ଟ କରିବା ପାଇଁ କରାଯାଇଛି ଜୋରଦାର ପ୍ରସ୍ତୁତି । ପ୍ରାୟ ୧୦୦ରୁ ଅଧିକ ମଣ୍ଡପରେ ଅଗ୍ରପୂଜ୍ୟଙ୍କ ପୂଜା ଚାଲିଥିବା ଦେଖିବାକୁ ମିଳିଛି ।
କୋଭିଡ଼ କଟକଣା ଯୋଗୁଁ ଦୀର୍ଘ ୨ବର୍ଷ ହେବ ପୂଜା ବନ୍ଦ ରହିଥିବା ବେଳେ ଚଳିତ ବର୍ଷ ପୂଜାରେ ସନ୍ଧ୍ୟାରେ ପୂଜା ମଣ୍ଡପରେ ଲକ୍ଷାଧିକ ଶ୍ରଦ୍ଧାଳୁଙ୍କ ଭିଡ଼ ଜମୁଥିବା ବେଳେ ମିନା ବଜାର ଓ ଚଟପଟି ଖାଇବାର ମଜା ନେବା ସହ ସେଲ୍ଫି ଉଠାଇ ମଜା ନେଉଛନ୍ତି ଶ୍ରଦ୍ଧାଳୁ । ଦିନ ଯେତିକି ଗଡୁଛି ତାଳଚେରରେ ସେତିକି ଜମୁଛି ଗଣେଶ ପୂଜା । ପୂଜା ମଣ୍ଡପ ଗୁଡିକରେ ଆଲୋକମାଳା ସାଙ୍ଗକୁ ଖୁବ ଆକର୍ଷଣୀୟ ହୋଇଛି ତୋରଣ । ଚଳିତ ବର୍ଷ ୧୦୦ ରୁ ଊର୍ଦ୍ଧ୍ବ ଛୋଟ ଓ ବଡ଼ ମଣ୍ଡପରେ ପୂଜାପାଉଛନ୍ତି ପ୍ରଭୁ ଗଜାନନ ।
ଏହା ବି ପଢନ୍ତୁ- ଗଣେଶ ଭସାଣି ପାଇଁ ମେଳଣ ଉତ୍ସବ, ଶୋଭାଯାତ୍ରାରେ ଦୁଲୁକିଲା ସହର
ତାଳଚେରରେ ଏହା ଏକ ଗଣ ପର୍ବ ହୋଇଥିବାରୁ ସମସ୍ତ ବର୍ଗର ଲୋକ ଏହି ପୂଜାରେ ସାମୀଲ ହୋଇଥାନ୍ତି । ଏହାକୁ ନଜରରେ ରଖି ଶ୍ରଦ୍ଧାଳୁଙ୍କୁ ଆକୃଷ୍ଟ କରିବା ସହ ପୂଜା ମଣ୍ଡପ ଗୁଡିକ ପୁରସ୍କାର ପାଇବା ଆଶାରେ ବିଭିନ୍ନ ପୌରାଣିକ କଥାବସ୍ତୁ ଉପରେ ସାଜ ସଜା ଯାଇଥିବାବେଳେ, ଭଳିକି ଭଳି ଆଲୋକର ତୋରଣ ଗୁଡିକୁ ମଧ୍ୟ୍ୟ ସଜାଯାଇଛି । କୋଭିଡ଼ କଟକଣା ଯୋଗୁଁ ଦୀର୍ଘ ୨ବର୍ଷ ହେବ ପୂଜା ବନ୍ଦ ରହିଥିବା ବେଳେ ଚଳିତ ବର୍ଷ ଗତ ୩୧ ତାରିଖରୁ ପୂଜା ଆରମ୍ଭ ହୋଇଥିବା ବେଳେ ସନ୍ଧ୍ୟା ହେଲେ ବିଭିନ୍ନ ମଣ୍ଡପରେ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳୁଛି ।
ଦୀର୍ଘ ୧୦ ଦିନ ଧରି ଚାଲିବାକୁ ଥିବା ଏହି ପୂଜାରେ ତାଳଚେରକୁ ବିଭିନ୍ନ ଜିଲ୍ଲା ତଥା ରାଜ୍ୟରୁ ଭକ୍ତଙ୍କ ସୁଅ ଛୁଟି ବାରେ ଲାଗିଛି । ମିନା ବଜାର ସାଙ୍ଗକୁ ବିଭିନ୍ନ ଦୋକାନ ବଜାର ଓ ଚଟପଟି ଖାଇବାର ମଜା ଉଠାଇଛନ୍ତି ଶ୍ରଦ୍ଧାଳୁ । ଅନ୍ୟପଟେ ପ୍ରତ୍ୟକ ଦିନ କେନ୍ଦ୍ରୀୟ ଗଣେଶ ପୂଜା କମିଟି ପକ୍ଷରୁ ଆୟୋଜିତ ସାଂସ୍କୃତିକ କାର୍ଯ୍ୟକ୍ରମ ଲୋକଙ୍କୁ ବେଶ ଆକୃଷ୍ଟ କରିପାରିଛି । ସେପଟେ ଭିଡ଼କୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥାକୁ ମଧ୍ୟ କଡାକଡି କରାଯାଇଛି । ତେବେ ଚଳିତ ବର୍ଷ ଆସନ୍ତା ୧୦ ତାରିଖରେ ଭସାଣି ଉତ୍ସବ ଅନୁଷ୍ଠିତ ହେବ । ଏହି ଉତ୍ସବରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହେବ ବୋଲି ଆଶା କରାଯାଉଛି ।
ଇଟିଭି ଭାରତ, ଅନୁଗୋଳ
