ଅନୁଗୋଳ: ଶିକ୍ଷକଙ୍କ ଅନଶନ । ଗତ 11 ଦିନ ହେବ ନିଯୁକ୍ତି ପାଇଁ ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଅହୋରାତ୍ର ଧାରଣାରେ ବସିଥିବା ଶିକ୍ଷକମାନେ ଆଜିଠାରୁ (ସୋମବାର) ଆରମ୍ଭ କରିଛନ୍ତି ଅନଶନ । ଅନୁଗୋଳ ଜିଲ୍ଲା ଖଣିଜ ପାଣ୍ଠିରୁ ନିଯୁକ୍ତି ପାଇଥିବା ଶିକ୍ଷକଶିକ୍ଷୟତ୍ରୀଙ୍କ ଚାକିରୀକୁ ନବୀକରଣ କରାଯାଇ ନ ଥିବାରୁ ସେମାନେ କ୍ଷୋଭ ପ୍ରକାଶ କରିଛନ୍ତି । ଏହାସହ ସେମାନଙ୍କ ସ୍ଥାନରେ ନୂତନ ଶିକ୍ଷକ ନିଯୁକ୍ତି ପାଇଁ ବିଜ୍ଞପ୍ତି ମଧ୍ୟ ପ୍ରକାଶ କରାଯାଇ ଥୁବାରୁ ଶିକ୍ଷକ ମାନେ ଏହାକୁ ବିରୋଧ କରି ଆନ୍ଦୋଳନ ଜାରି ରଖିଛନ୍ତି।
ଜିଲ୍ଲା ପ୍ରଶାସନ ପକ୍ଷରୁ 2018 ମସିହାରେ 133 ଜଣ ଶିକ୍ଷକ ନିଯୁକ୍ତି ପାଇଥିଲେ । ନିଯୁକ୍ତି ଅନୁଯାୟୀ ପ୍ରତିବର୍ଷ ସେମାନଙ୍କ ନିଯୁକ୍ତି ନବୀକରଣ କରାଯିବା କଥା। ମାତ୍ର କୋଭିଡ ଆଳ ଦେଖାଇ ଶିକ୍ଷା ବିଭାଗ ସେମାନଙ୍କୁ ପୁନଃ ନିଯୁକ୍ତି ନ ଦେଇ ତାଙ୍କ ସ୍ଥାନରେ ନୂତନ ଶିକ୍ଷକ ନିଯୁକ୍ତି ପାଇଁ ବିଜ୍ଞପ୍ତି ଜାରି କରିଛନ୍ତି । ଯାହାର ପ୍ରତିବାଦରେ 11 ଦିନ ହେବ ଶୀତ କାକରରେ ଶିକ୍ଷକମାନେ ଦିନରାତି ଆନ୍ଦୋଳନ ଜାରି ରଖିଛନ୍ତି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
