ଅନୁଗୋଳ: ଜିଲ୍ଲା ମୁଖ୍ୟ ଚିକିତ୍ସାଳୟରେ ଦେଖିବାକୁ ମିଳିଛି ଅଭାବନୀୟ ଦୃଶ୍ୟ । ମୃତ ବ୍ୟକ୍ତିଙ୍କୁ ଜୀବିତ ଭାବି ତେଲ ଲଗାଇ ଚିକିତ୍ସା କଲେ ପରିବାର ଲୋକେ । ଶେଷରେ ମୃତକଜଣଙ୍କ ଜୀବିତ ବୋଲି କହିବା ସହ ହସ୍ପିଟାଲରୁ ମୃତଦେହ ଧରି ଘରକୁ ପଳାଇବାକୁ କଲେ ଉଦ୍ୟମ। ଯାହାକୁ ଅଟକାଇବା ପାଇଁ ପୋଲିସ ନାକେଦମ ହୋଇଥିଲା । ଆଜି ଅପରାହ୍ନରେ ଏଭଳି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଥିଲା ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟର ବର୍ହିଃ ବିଭାଗ ବାହାରେ ।
ମିଳିଥିବା ସୂଚନା ଅନୁସାରେ, ଢେଙ୍କାନାଳ ଜିଲ୍ଲା ବାଲିମି ଥାନା ବଙ୍ଗିଡ଼ି ଗାଁର ଆଲୋକ ନାଏକ ନାମକ ଜଣେ ଯୁବକ ଆଜି ପୋଖରୀରୁ ପଦ୍ମଫୁଲ ତୋଳିବାବେଳେ ପାଣିରେ ବୁଡି ଯାଇଥିଲେ । ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। କିନ୍ତୁ ଡାକ୍ତରଙ୍କ ମୃତ ଘୋଷଣାକୁ ସହଜରେ ଗ୍ରହଣ କରିପାରି ନଥିଲେ ପରିବାର ଓ ସମ୍ପର୍କୀୟ ।
ତାଙ୍କୁ ମୃତ ନୁହେଁ ଜୀବିତ କହିବା ସହ ହସ୍ପିଟାଲ ପରିସରରେ ହିଁ ଦେହରେ ତେଲ ଲଗାଇ ଚିକିତ୍ସା ଆରମ୍ଭ କରିଥିଲେ ସମ୍ପର୍କୀୟ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଥିଲେ ମଧ୍ୟ ପରିବାର ଲୋକଙ୍କୁ ବୁଝାଇବାରେ ନାକେଦମ ହୋଇଥିଲା । ପରିସ୍ଥିତି ଏଭଳି ହୋଇଥିଲା ଯେ ସମ୍ପର୍କୀୟମାନେ ମୃତଦେହ ଧରି ହସ୍ପିଟାଲରୁ ଫେରିଯିବାକୁ ମଧ୍ୟ ଉଦ୍ୟମ କରିଥିଲେ । ଶେଷରେ ପୋଲିସର ବରିଷ୍ଠ ଅଧିକାରୀମାନେ ଆସି ପୁଣିଥରେ ଡାକ୍ତରୀ ପରୀକ୍ଷା କରାଇବା ପରେ ସ୍ଥିତି ସ୍ବାଭାବିକ ହୋଇଥିଲା । ପରେ ପୋଲିସ ମୃତଦେହ ବ୍ୟବଚ୍ଛେଦ ପାଇଁ ପଠାଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
