ଅନୁଗୋଳ: ପୁଣି ହାତୀ ନେଇଛି ମଣିଷ ଜୀବନ । ବିଲ ରାସ୍ତା ଦେଇ ଆସୁଥିବାବେଳେ ଦଳିଦେଲା ଦନ୍ତା ହାତୀ । ଘଟଣାସ୍ଥଳରେ ପ୍ରାଣ ହରାଇଲେ ମହିଳା । ଏଭଳି ଅଭାବନୀୟ ଘଟଣା ଘଟିଛି ଅନୁଗୋଳ ଜିଲ୍ଲା ଛେଣ୍ଡିପଦା ବନାଞ୍ଚଳରେ। ମୃତ ମହିଳା ହେଉଛନ୍ତି ପାଣପଶି ଗାଁର ନଳିତା ମାଝୀ ।
ମାଳତୀ ଗାଁରୁ ବିଲ ରାସ୍ତା ଦେଇ ବାଗଡ଼ିଆ ଗାଁ ଯାଉଥିଲେ । ତେବେ ଗାଁ ପାଖାପାଖି ହୋଇଥିବାବେଳେ ହଠାତ ତାଙ୍କୁ ଏକ ହାତୀ ଆକ୍ରମଣ କରିଥିଲା । ହାତୀ ଦାନ୍ତରେ ମାଳତୀଙ୍କ ପେଟକୁ ଭୁଷି ଦେବା ସହ ତାଙ୍କ ମୁହଁକୁ ପାଦରେ ଦଳି ଦେଇଥିଲା ।ଫଳରେ ତାଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା ।
ଭିଡିଓ ସୌଜନ୍ୟ: ସମ୍ବାଦଦାତା, ଅନୁଗୋଳ
ତେବେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି । ହାତୀ ଘଉଡାଇବା ଓ କ୍ଷତିପୂରଣ ଦାବିରେ ସ୍ଥାନୀୟ ଲୋକେ ବାଗଡ଼ିଆ-ଛେଣ୍ଡିପଦା ରାସ୍ତା ଅବରୋଧ କରିଛନ୍ତି । ସେପଟେ ଘଟଣାସ୍ଥଳରେ ଏପର୍ଯ୍ୟନ୍ତ ବନ ବିଭାଗ କିମ୍ବା ପୋଲିସ ଅଧିକାରୀ ପହଞ୍ଚିନଥିବା ସୂଚନା ରହିଛି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
