ଅନୁଗୋଳ: ଆସୁଛନ୍ତି ମା'। ଯାହାକୁ ନେଇ ଶେଷ ପର୍ଯ୍ୟାୟରେ ପହଞ୍ଚିଛି ପ୍ରସ୍ତୁତି ପର୍ବ । କେଉଁଠି ଶିଳ୍ପୀ ମା'ଙ୍କ ମୃଣମୟୀ ମୂର୍ତ୍ତିରେ ଶେଷ ସ୍ପର୍ଶ ଦେଉଥିବା ବେଳେ ଆଉ କେଉଁଠି କାରିଗରଟି ମଣ୍ଡପ କାମ ସାରିବାରେ ଲାଗିପଡିଛି । ଶୁକ୍ରବାର ବିଲ୍ବ ବରଣ ପରେ ଶନିବାର ଠାରୁ ଆରମ୍ଭ ହେବ ମଣ୍ଡପରେ ସପ୍ତମୀ ପୂଜା ।
ଅନୁଗୋଳ ସହରରେ ଏଥର ଦଶଟି ମଣ୍ଡପରେ ମା' ଦଶଭୁଜାଙ୍କୁ ଆବାହନ କରାଯିବ । ଏଥିପାଇଁ ପୂଜା ପ୍ରସ୍ତୁତିରେ ଲାଗିପଡିଛନ୍ତି ପୂଜା ମଣ୍ଡପର କର୍ମକର୍ତ୍ତା , ଶିଳ୍ପୀ ଓ କାରିଗର । ଏଥର ଦୁର୍ଗାଙ୍କର ପୂଜା ସମିତି 83ତମ ପୂଜା ଉତ୍ସବ ପାଳନ କରୁଛି । ସେହିପରି ଶିମିଳିପଡା ପୂଜା କମିଟି 40ତମ ଦୂର୍ଗା ପୂଜାକୁ ଆକର୍ଷଣୀୟ କରିବା ପାଇଁ ପ୍ରସ୍ତୁତି ଖୁବ ଜୋରସୋରରେ ଚଳାଇଛି । ସେପଟେ ହିନ୍ଦୁ , ମୁସଲମାନ, ସବୁ ଧର୍ମର ଲୋକଙ୍କୁ ନେଇ ଏଥର 55ତମ ପୂଜାଉତ୍ସବ ପାଳୁଛି ହେମସରପଡା ପୂଜା ସମିତି ।
ସହର ଅନ୍ୟତମ ପୂଜା କମିଟି ହୁଲୁରିସିଙ୍ଘା । ଏଥର 65 ବର୍ଷରେ ପଦାର୍ପଣ କରିଛି ଏହି କମିଟି। ପୂଜାକୁ ଆକର୍ଷଣୀୟ କରିବା ପାଇଁ ସମସ୍ତ ପ୍ରକାର ପ୍ରସ୍ତୁତିକୁ ସାରିବା ପାଇଁ ଲାଗିପଡିଛନ୍ତି ମଣ୍ଡପର କର୍ମକର୍ତ୍ତା । ସେହିପରି ସହରର ସବୁଠୁ ପୁରୁଣା ପୂଜା ମଣ୍ଡପ ଅମଲାପଡା ଏଥର 94ତମ ପୂଜା ଉତ୍ସବ ପାଳନ କରୁଛି ।
ଏଥିପାଇଁ ମୂର୍ତ୍ତି ପ୍ରସ୍ତୁତି ଠାରୁ ତୋରଣ ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚିଛି । ପୂଜାର ପ୍ରତ୍ୟେକ ଦିନ ସାଂସ୍କୃତିକ କାର୍ଯ୍ୟକ୍ରମ ସହ ଏଥର ପ୍ରଥମ କରି ଦାଣ୍ଡିଆ ନାଇଟ୍ସ କରିବାର ଯୋଜନା କରିଛି ଅମଲାପଡା ପୂଜା ମଣ୍ଡପ । ସେହିପରି ସହରର ଅନ୍ୟ ସମସ୍ତ ପୂଜା ମଣ୍ଡପ ଶୁଶୁଡା, କାଲଟାକ୍ସ ଆଦି ପୂଜା ମଣ୍ଡପରେ ପ୍ରସ୍ତୁତି ପ୍ରାୟତଃ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ମା'ଙ୍କ ମୃଣମୟୀ ମୂର୍ତ୍ତିରେ ଶେଷ ସ୍ପର୍ଶ ଦେଉଛନ୍ତି ଶିଳ୍ପୀ । ତେବେ ଏଥରର ପୂଜା ମଣ୍ଡପରେ ମା'ଙ୍କ ପୂଜା 5 ତାରିଖରୁ ଆରମ୍ଭ ହୋଇ 8 ତାରିଖରେ ଶେଷ ହେବ । ଯାହାକୁ ନେଇ ସମସ୍ତେ ଉତ୍କଣ୍ଠାର ସହ ଅପେକ୍ଷା କରିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
