ଅନୁଗୋଳ: କୋରୋନା କଟକଣା କାରଣରୁ ଫିକା ପଡିଲା ଅନୁଗୋଳ ଦୀପାବଳି । ବାଣ ଫୁଟାଇବାକୁ ବାରଣ କରାଯିବା ପରେ କେବଳ ଦୀପ ଜାଳି ଦୀପାବଳି ପାଳନ କରିବାକୁ ନିଷ୍ପତ୍ତି ନେଇଛନ୍ତି । ତେଣୁ ମାଟିର ବିଭିନ୍ନ କିଶମର ଦୀପ କିଣିବାକୁ ଲୋକଙ୍କ ଭିଡ଼ ଦେଖିବାକୁ ମିଳିଛି ।
ଯଦିଓ ବିଗତ ବର୍ଷ ପରି ଲୋକଙ୍କ ଏତେଟା ଭିଡ଼ ଜମୁନାହିଁ ତଥାପି ଦୀପ ଦୋକାନରେ ଲୋକଙ୍କ ଗହଳି ଦେଖିବାକୁ ମିଳୁଛି । ଏତିସହ କାଉଁରିଆ କାଠି, ଆଖୁ ଓ ପୂଜା ପାଇଁ ଅନ୍ୟାନ୍ୟ ଆବଶ୍ୟକ ଜିନିଷ କିଣୁଛନ୍ତି ଲୋକେ । ସେହିପରି ଦୋକାନୀମାନେ ଲକ୍ଷ୍ମୀଙ୍କ ଛୋଟମୂର୍ତ୍ତି କିଣିବା ସହ କଦଳୀ ଗଛ, ଫୁଲ ଓ ଆଲୋକରେ ଦୋକାନଗୁଡିକୁ ସଜାଉଛନ୍ତି । କୋରୋନା କଟକଣା ଭିତରେ ବିନା ବାଣରେ ଅତି ନିରାଡ଼ମ୍ବର ଭାବେ ଦୀପାବଳି ପାଳନ କରୁଛନ୍ତି ଲୋକେ । ପ୍ରତିବର୍ଷ ଅନୁଗୋଳରେ ପ୍ରାୟ କୋଟିଏ ଟଙ୍କାର ବାଣ କାରବାର ହେଉ ଥିବାବେଳେ ଚଳିତବର୍ଷ ବାଣ କାରବାର ହେଉନଥିବା ଦେଖିବାକୁ ମିଳୁଛି । ତଥାପି କୋରୋନା ଭଳି ମହାମାରୀରୁ ରକ୍ଷା ପାଇବା ପାଇଁ ସରକାର ଯେଉଁ ନିଷ୍ପତ୍ତି ନେଇଛନ୍ତି, ତାହାକୁ ସ୍ୱାଗତ କରିଛନ୍ତି ଲୋକେ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
