ଅନୁଗୋଳ: ଦୁର୍ଦ୍ଦିନରେ ଅନୁଗୋଳ ଜିଲ୍ଲାର କପା ଚାଷୀ। କପା ଉତ୍ପାଦନ ହେଉଛି କିନ୍ତୁ ବିକ୍ରି ପାଇଁ ସୁବିଧା ନାହିଁ । ଫଳରେ ଚାଷୀମାନେ ନିଜସ୍ୱ ଖର୍ଚ୍ଚରେ ବଲାଙ୍ଗୀର ନେଇ ବିକ୍ରି କରିବାକୁ ବାଧ୍ୟ ହେଉଛନ୍ତି । ଜିଲ୍ଲାର ଆଠମଲ୍ଲିକ ଏବଂ ଅନୁଗୋଳ ଅଞ୍ଚଳରେ ପ୍ରାୟ ୨ ଶହ ଏକରରୁ ଅଧିକ ଜମିରେ କପା ଚାଷ ହେଉଥିବା ବେଳେ ସରକାରୀ ପ୍ରୋତ୍ସାହନ ମଧ୍ୟ ମିଳୁ ନାହିଁ । କିନ୍ତୁ କପା ଚାଷ କରି ଉତ୍ପାଦନ ପରେ ମଧ୍ୟ ବିକ୍ରି ବଟାକୁ ନେଇ ଅସୁବିଧାର ସମ୍ମୁଖୀନ ହେଉଛନ୍ତି ।
ଆଠମଲ୍ଲିକ ଓ ଅନୁଗୋଳ ବ୍ଲକ୍ର କିଛି ଜଙ୍ଗଲ ଅଧ୍ୟୁସୁତ ଅଞ୍ଚଳରେ ବନ୍ୟଜନ୍ତୁ ପ୍ରାଦୁର୍ଭାବ ଯୋଗୁ କୌଣସି ଫସଲ ହୋଇ ପାରୁ ନାହିଁ। କିଛି ବର୍ଷ ହେଲା ଶହ ଶହ ଏକର ଜମି ପଡିଆ ପଡୁଥିଲା। ଏହାକୁ ଦେଖି ଅନେକ ଚାଷୀ ଏବେ କପା ଚାଷକୁ ଅପଣେଇଛନ୍ତି। କାରଣ କପା ଚାଷରୁ ଭଲ ଲାଭ ହୁଏ। ଅତି କମ ଜଳସେଚନର ଆବଶ୍ୟକତା ପଡେ। ଗତ ୩ରୁ ୪ ବର୍ଷ ହେଲା ଜିଲ୍ଲାରେ ପ୍ରାୟ ୫ଶହ ଏକରରୁ ଅଧିକ ଜମିରେ କପା ଚାଷ ହେଉଛି। ଚାଷୀଙ୍କ କହିବା ଅନୁସାରେ ଗୋଟିଏ ଏକର ଜମିରେ ୫ ରୁ ୭ କୁଇଣ୍ଟାଲ କପା ଉତ୍ପାଦନ ହୁଏ। କୁଇଣ୍ଟାଲ ପ୍ରତି ସାଢ଼େ ସାତ ହଜାର ଟଙ୍କାରେ ବିକ୍ରି ହୁଏ।
ଏକର ପ୍ରତି ବିହନ, ଔଷଧ, ଜଳସେଚନ ଏବଂ କପା ତୋଳିବା ମଜୁରୀ ମିଶିଲେ ୨୫ହଜାର ଟଙ୍କା ଖର୍ଚ୍ଚ ହୋଇଥାଏ । ତେଣୁ ଦେଖିବାକୁ ଗଲେ ଚାଷୀଙ୍କର ଭଲ ଦୁଇ ପଇସା ଲାଭ ମଧ୍ୟ ହୁଏ । ହେଲେ ଜିଲ୍ଲାରେ କପା ଚାଷୀଙ୍କ ଦୁର୍ଦ୍ଦଶା ବଢି ଚାଲିଛି । କାରଣ ଏଠାରେ ଉତ୍ପାଦିତ ହେଉଥିବା କପା ବିକ୍ରି ପାଇଁ ସୁବିଧା ନାହିଁ । କିଛି ଚାଷୀ ବାଧ୍ୟ ହୋଇ ସୁଦୂର ବଲାଙ୍ଗୀର ନେଇ ବିକ୍ରି କରୁଛନ୍ତି । ଫଳରେ ପରିବହନ ଖର୍ଚ୍ଚ ଅଧିକ ହେଉଛି । ଆଉ କିଛି ଚାଷୀଙ୍କଠାରୁ ଆନ୍ଧ୍ରପ୍ରଦେଶର ବ୍ୟବସାୟୀ ଆସି କମ୍ ଦରରେ କିଣି ନେଉଛନ୍ତି । ତେଣୁ ଚାଷୀଙ୍କର ଯେତିକି ଲାଭ ହେବା କଥା ସେତିକି ହୋଇ ପାରୁନାହିଁ ।
