ଅନୁଗୋଳ: ପୌର ନିର୍ଵାଚନ ପାଇଁ ନାମାଙ୍କନ ଦାଖଲର ଆଜି ଥିଲା ଶେଷ ଦିନ । ଶେଷ ଦିନରେ ଅନୁଗୋଳ ପୌରପାଳିକା ପାଇଁ ଉଭୟ ଶାସକ ବିଜେଡି ଓ ବିରୋଧୀ ବିଜେପି ପକ୍ଷରୁ ପାର୍ଥିପତ୍ର ଦାଖଲ କରାଯାଇଛି । ଅନୁଗୋଳ ପୌରାଞ୍ଚଳର ଅଧ୍ୟକ୍ଷ ପଦବୀ ନିମନ୍ତେ ବିଜେଡିର ଅକ୍ଷୟ କୁମାର ସାମନ୍ତଙ୍କ ସମେତ ସମସ୍ତ ୨୩ ଟି ୱାର୍ଡର କାଉନସିଲର ପ୍ରାର୍ଥୀ ମାନଙ୍କ ସହ ଆସି ଉପ-ଜିଲ୍ଲାପାଳଙ୍କ କାର୍ଯ୍ୟାଳୟରେ ନାମାଙ୍କନ ପତ୍ର ଦାଖଲ କରିଥିଲେ ।
ସେହିପରି ବିଜେପିର ଦିଲ୍ଲୀପ କୁମାର ପ୍ରଧାନ ଅଧ୍ୟକ୍ଷ ପ୍ରାର୍ଥୀ ଏବଂ ଅନ୍ୟ ୨୩ ଜଣ କାଉନସିଲର ପ୍ରାର୍ଥୀ ଆସି ନିଜ ନିଜର ନାମାଙ୍କନ ପତ୍ର ଦାଖଲ କରିଥିଲେ । ଉଭୟ ଦଳର ଶତାଧିକ କର୍ମୀ ବାଜା ବଜାଇ ସହର ପରିକ୍ରମା କରି ଆସିଥିଲେ। ସହରରେ ନିଜ ନିଜ ଦଳର ଶକ୍ତି ପ୍ରଦର୍ଶନ କରିଥିଲେ ।
ବିଜେଡି ଜଗନ୍ନାଥ ମନ୍ଦିର ସମ୍ମଖରୁ ଶୋଭାଯାତ୍ରାରେ ଆସି ଉପଜିଲ୍ଲାପାଳ କାର୍ଯ୍ୟାଳୟରେ ପହଞ୍ଚିଥିବା ବେଳେ ବୁଢୀ ଠାକୁରାଣୀ ମନ୍ଦିରରୁ ବିଜେପିର ଶୋଭାଯାତ୍ରା ବାହାରି ସହର ପରିକ୍ରମା କରିଥିଲା । ଉଭୟ ଦଳର ବରିଷ୍ଠ ନେତା ମାନେ ନିଜ ନିଜ ପ୍ରାର୍ଥୀ ମାନଙ୍କୁ ଧରି ଶୋଭାଯାତ୍ରାରେ ଆସିଥିଲେ। ଏହାବ୍ୟତୀତ ଆମ ଆଦମୀର ପ୍ରାର୍ଥି ମାନେ ମଧ୍ୟ ଆଜି ପ୍ରାର୍ଥିପତ୍ର ଦାଖଲ କରିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
