ଅନୁଗୋଳ: ଟିଟିପିଏସ ବନ୍ଦ କୁନେଇ ଏବେ ମୁହଁ ଖୋଲିଛି ଶାସକ ବିଜେଡ଼ି । ଟିଟିପିଏସ ବନ୍ଦ ବିରୁଦ୍ଧରେ ଦଳ ପକ୍ଷରୁ 12 ଘଣ୍ଟିଆ ଅନୁଗୋଳ ବନ୍ଦ ଡାକରା ଦେଇଛି ଦଳ । ତେବେ ଆସନ୍ତା ୭ ତାରିଖ ସକାଳ ୬ ରୁ ସନ୍ଧ୍ୟା ୬ ଟା ପର୍ଯ୍ୟନ୍ତ ୧୨ଘଣ୍ଟିଆ ଅନୁଗୋଳ ବନ୍ଦ ଡାକରା ଦେଇଛି ବିଜେଡି । ସୋମବାର ସନ୍ଧ୍ୟାରେ ଏନେଇ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ଦଳର ବରିଷ୍ଠ ନେତା ତଥା ବିଧାୟକମାନେ ଏଭଳି ସୂଚନା ଦେଇଛନ୍ତି ।
ଦଳର ଜିଲ୍ଲା ସଭାପତି ମହେନ୍ଦ୍ର ବସ୍ତିଆଙ୍କ ସଭାପତିତ୍ବରେ ଅନୁଷ୍ଠିତ ଏହି ସାମ୍ବାଦିକ ସମିଳନୀରେ ତାଳଚେର ବିଧାୟକ ବ୍ରଜକିଶୋର ପ୍ରଧାନ, ଛେଣ୍ଡିପଦା ବିଧାୟକ ସୁଶାନ୍ତ ବେହେରା, ପାଲଲହଡ଼ା ବିଧାୟକ ମୁକେଶ ପାଳଙ୍କ ସମେତ ଅନୁଗୋଳ ଓ ଆଠମଲ୍ଲିକ ବିଧାୟକଙ୍କ ପ୍ରତିନିଧିମାନେ ଯୋଗ ଦେଇଥିଲେ । କେନ୍ଦ୍ର ସରକାର ପ୍ରଦୂଷଣ ଆଳ ଦେଖାଇ ଟିଟିପିଏସ ଭଳି ଏକ କାର୍ଯ୍ୟକ୍ଷମ ପ୍ଲାଣ୍ଟ ବନ୍ଦ କରିବା ଯୋଗୁ କେବଳ ଅନୁଗୋଳ ନୁହେଁ ସାରା ରାଜ୍ୟ କ୍ଷତି ସହୁଛି ।
ଏଠାରେ ପ୍ରତ୍ୟକ୍ଷ ଓ ପରୋକ୍ଷ ଭାବେ କାମ କରି ପେଟ ପୋଷୁଥିବା ଲକ୍ଷାଧିକ ଲୋକ ପ୍ରଭାବିତ ହେଲେ । ତେଣୁ ଏହାର ପ୍ରତିବାଦରେ ବିଜେଡି ପ୍ରାଥମିକ ପର୍ଯ୍ୟାୟରେ ଅନୁଗୋଳ ବନ୍ଦ ଡାକରା ଦେଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
