ଅନୁଗୋଳ: ସରକାରୀ ଯୋଜନାରେ କାମ କରି ଉପାସରେ ଦିନ କାଟୁଥିବା ଶ୍ରମିକ ପରିବାର । ମଜୁରୀ କେବେ ମିଳିବ ସେ ନେଇ ଗଣୁଛନ୍ତି ଦିନ । ହେଲେ ଏହା ଭିତରେ ଦୁଇ ମାସ ବିତିଗଲାଣି, ତଥାପି ହାତକୁ ପୁରୁଣା କାମର ମିଳିନି ମଜୁରୀ । ଏହି କୋରୋନା କଟକଣା ମଧ୍ୟରେ କାମ ଧନ୍ଦା ନପାଇ ଭୋକ ଉପାସରେ ରହୁଥିବା ଶ୍ରମିକ ଶ୍ରେଣୀର ଏହି ଲୋକମାନେ ଏବେ ସରକାରୀ ଯୋଜନାରେ କାମ ପାଇ ବି ମଜୁରୀ ପାଉନାହାନ୍ତି । ଏନେଇ ଆପତ୍ତି କଲେ ବି କେହି ଶୁଣୁନାହାନ୍ତି । ଶ୍ରମିକଙ୍କ କ୍ଷେତ୍ରରେ ଏଭଳି ଅସୁବିଧା ଦେଖିବାକୁ ମିଳିଛି ଅନୁଗୋଳ ଜିଲ୍ଲାର ଅନ୍ତୁଳିଆ ପଞ୍ଚାୟତରେ । ଦୁଇ ମାସ ହେବ ଗାଁରେ ଏକ ମାଟି ରାସ୍ତା ନିର୍ମାଣ କରିଥିଲେ ହେଁ ହେଲେ ଆଜି ଯାଏଁ ସେ କାମର ଏମାନଙ୍କୁ ମିଳିନି ମଜୁରୀ ।
ସୂଚନା ଅନୁସାରେ କୋରନା ସମୟରେ ଶ୍ରମିକ ଙ୍କୁ ନିଜ ନିଜ ଗାଁରେ କାମ ଦେବା ପାଇଁ ସରକାର ମନରୋଗ ବା ମହାତ୍ମା ଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନାରେ କାମ ଯୋଗାଇଥିଲେ । ଯେଉଁ କାମ କଲେ ଶ୍ରମିକଟିଏ ପ୍ରତି ସପ୍ତାହରେ ସରକାରୀ ମୂଲ୍ୟରେ ତାର ମଜୁରୀ ପାଇବା କଥା । ହେଲେ ଏହି ପଞ୍ଚାୟତରେ ସେଥିରେ ବ୍ୟତିକ୍ରମ ହୋଇଛି । ଦୁଇ ମାସରୁ ଅଧିକ ସମୟ ବିତିଥିଲେ ବି 100 ରୁ ଅଧିକ ଶ୍ରମିକ ତାଙ୍କ ମଜୁରୀ ପାଇ ନାହାନ୍ତି । ପ୍ରତ୍ୟେକ ଶ୍ରମିକଙ୍କ ହାରାହାରି 5ରୁ 7 ହଜାରୁ ଅଧିକ ଟଙ୍କା ଲେଖାଏଁ ପାଇବାର ଅଛି । ହେଲେ ଏନେଇ କୌଣସି ଅଧିକାରୀଙ୍କ ନିକଟରେ ଖବର ନାହିଁ ।
ସେପଟେ ଏନେଇ ଆମେ ବିଡିଓଙ୍କ ଠାରୁ ଆରମ୍ଭ କରି ଗ୍ରାମ୍ୟ ଉନ୍ନୟନ ବିଭାଗର ପ୍ରକଳ୍ପ ନିର୍ଦ୍ଦେଶକଙ୍କ ସହ ଯୋଗାଯୋଗ କରିଥିଲୁ ହେଲେ କାହାରି ପାଖରେ ଏନେଇ ଖବର ନଥିବା କହିଛନ୍ତି ।
କେବଳ ଅନ୍ତୁଳିଆ ପଞ୍ଚାୟତ ନୁହେଁ ଏମିତି ଅନେକ ପଞ୍ଚାୟତ ଅଛି ଯେଉଁଠି ଶ୍ରମିକମାନେ ମୁଣ୍ଡ ଝାଳ ତୁଣ୍ଡରେ ମାରି ଖଟିଛନ୍ତି । କିନ୍ତୁ ପ୍ରଶାସନିକ ଅବହେଳା ଯୋଗୁଁ ଶ୍ରମିକମାନେ ସଠିକ ସମୟରେ ମଜୁରୀ ପାଇ ପାରୁ ନାହାନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ ଇଟିଭି ଭାରତ
