ଅନୁଗୋଳ: ଫସଲ ପାଇଁ ରାତି ଅନିଦ୍ରା ଚାଷୀ । ଅମଳ ସମୟରେ ହାତୀପଲ କ୍ଷେତ ଉଜାଡୁଥିବାରୁ ଫସଲକୁ ଅମଳ ପାଇଁ ଚାଷୀ ରାତି ଅନିଦ୍ରା ହେଇ ରହୁଥିବା ଦେଖିବାକୁ ମିଳୁଛି । ଏଭଳି ସ୍ଥିତି ଦେଖିବାକୁ ମିଳୁଛି ଅନୁଗୋଳ ଜିଲ୍ଲାର ବନ୍ତଳା ବନାଞ୍ଚଳ ଆରାଢିଅ ଗାଁର ।
ଗାଁରେ ପ୍ରାୟ ସମସ୍ତେ ଚାଷ ଉପରେ ନିର୍ଭର କରନ୍ତି । ଧାନ ସହିତ ପନିପରିବା ଆଦି ଚାଷ କରନ୍ତି । କିନ୍ତୁ ଏବେ ବଣୁଆ ହାତୀପଲ ସେମାନଙ୍କ କ୍ଷେତ ଉଜାଡୁଛନ୍ତି । ଯାହାପାଇଁ ସନ୍ଧ୍ୟା ହେଲେ ଠେଙ୍ଗା ବାଡି ଧରି ଫସଲକୁ ସୁରକ୍ଷା ଦେଉଛନ୍ତି ଚାଷୀ । ଦିନ ରାତି ପରିଶ୍ରମ କରି କରିଥିବା ଚାଷର ଏବେ ଅମଳ ବେଳ । ହେଲେ ହାତୀଙ୍କ ପାଇଁ ଚାଷୀ ଏବେ ଘର ଛାଡି ଜମିରେ ରହୁଛନ୍ତି ।
ଜିଲ୍ଲାର ଜଙ୍ଗଲ ପାଖିଆ ସବୁ ଗାଁରେ ଏହି ଅବସ୍ଥା । ଏନେଇ ବନ ବିଭାଗକୁ କହିଲେ ବି କିଛି ପଦକ୍ଷେପ ନିଆଯାଉ ନଥିବା ଚାଷୀ ଅଭିଯୋଗ କରିଛନ୍ତି । ଏନେଇ ବନ ଖଣ୍ଡ ଅଧିକାରୀଙ୍କ କହିବା କଥା ହାତୀ ଘଉଡେଇବା ପାଇଁ ସମସ୍ତ ପଦକ୍ଷେପ ନିଆ ଯାଉଛି ଓ ଯାହା କ୍ଷତି ହେଉଛି ସେଥିପାଇଁ ଆବଶ୍ୟକୀୟ କ୍ଷତିପୂରଣ ଚାଷୀଙ୍କୁ ଯୋଗାଇ ଦିଆଯାଉଛି । ଯଦି ବିଭାଗ ଚାଷୀଙ୍କ ଏହି ଦୁର୍ଦଶା ସମୟରେ ସେମାନଙ୍କୁ ସହଯୋଗ ନକରେ ତେବେ ଚାଷୀର ବର୍ଷକର ରୋଜଗାର ହାତୀ ମୁହଁରେ ଚାଲିଯିବ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
