ଅନୁଗୋଳ: ଏଡସ ନାଁ ଶୁଣିଲେ ମନରେ ଜାତ ହୁଏ ଭୟ । ଏହି ମାରାତ୍ମକ ରୋଗକୁ ଯାହାକୁ ହୋଇଛି ସେ ଜାଣେ ଜୀବନ ଜୀଇଁବା କେତେ କଷ୍ଟ । ଏମିତି ଏକ କାହାଣୀ ହେଉଛି ଅନୁଗୋଳ ଜିଲ୍ଲା ବଳରାମ ପ୍ରସାଦରେ ରହୁଥିବା ଏଚଆଇଭି ଏଡସରେ ଆକ୍ରାନ୍ତରେ ହୋଇଥିବା ମହିଳାଙ୍କର । ଏଡସରେ ଆକ୍ରାନ୍ତ ହୋଇ ସ୍ବାମୀ ପ୍ରାଣ ହରାଇଥିଲେ । ଶାଶୂଘର ଲୋକ ବି ପର କରିଦେଲେ । ଜୀବନ ଯନ୍ତ୍ରଣାରେ ଜର୍ଜରିତ ମହିଳା ପାଇଁ ସବୁ ଯୋଜନା ଯେମିତି ବାଟବଣା ହୋଇଯାଇଛି ।
ସବୁ ଝିଅଙ୍କ ପରି ଅସୁମାରି ସ୍ବପ୍ନ ନେଇ ସାତ ଜନମ ପାଇଁ ସ୍ବାମୀଙ୍କ ହାତ ଧରିଥିଲେ ଅନୁଗୋଳର ଝିଅ । ଆଶା ଥିଲା ହାତରେ ହାତ, ପାଦରେ ପାଦ ମିଶାଇ ଚାଲିବେ ଅନେକ ବାଟ । ହେଲେ ସବୁ ସ୍ବପ୍ନ ଛାରଖାର କରିଦେଲା ଏଚଆଇଭି ଭୂତାଣୁ । ସ୍ବାମୀ ଅନ୍ୟ ରାଜ୍ୟରେ ଟ୍ରକ ଚଳାଉଥିବା ବେଳେ ଏଚଆଇଭିରେ ଆକ୍ରାନ୍ତ ହୋଇ ହୋଇ ପ୍ରାଣ ହରାଇଲେ । ପରେ ଜଣାପଡିଲା ସ୍ତ୍ରୀଙ୍କୁ ବି ମାଡିବସିଛି ଏହି ଭୂତାଣୁ । ଆଉ ଏକଥା ଜାଣିବା ପରେ ସାତ ପର କରିଦେଲେ ଶାଶୂଘର ଲୋକ । ସ୍ବାମୀ ଏକାକରି ଚାଲିଗଲେ, ଶାଶୂଘର ପର କରିଦେଲେ ସିନା କିନ୍ତୁ ଜୀବନ ଯୁଦ୍ଧରେ ହାରିନାହାଁନ୍ତି ସେ । ବାପଘରେ ରହି ନିଜର ଦୁଇ ପିଲାଙ୍କୁ ମଣିଷ କରିବା ପାଇଁ ପ୍ରତି ମୁହୂର୍ତ୍ତ କରିଚାଲିଛନ୍ତି ସଂଙ୍ଘର୍ଷ ।
ଏଡସ୍ ଆକ୍ରାନ୍ତଙ୍କ ପାଇଁ ସରକାର କରିଛନ୍ତି ମାଳମାଳ ଯୋଜନା । ଥରେ ନଜର ପକାନ୍ତୁ, ଜୀବନ ଜିଇଁବା ପାଇଁ ଏ ପରିବାର ପ୍ରତିଦିନ କିପରି କରୁଛି ଅହରହ ସଂଘର୍ଷ । ମୁଣ୍ଡ ଉପରେ ନା ଅଛି ଛାତ, ନା ଅଛି ରୋଜଗାରର ପନ୍ଥା । ଝାଟିମାଟି କୁଡିଆରେ ମୁଣ୍ଡ ଗୁଞ୍ଜିଛନ୍ତି 4 ପ୍ରାଣୀ । ଏହି ଅସହାୟ ପରିବାରକୁ ସାହା ହେବା ପାଇଁ ସରପଞ୍ଚକୁ ଜଣାଇଥିଲେ ଗାଁଲୋକେ ହେଲେ ଫଳ ଶୂନ । ଏନେଇ ଏଡସ୍ କଣ୍ଟ୍ରୋଲ ସୋସାଇଟି କର୍ତ୍ତୃପକ୍ଷଙ୍କୁ ଯୋଗଯୋଗ କରିଥିଲା ଇଟିଭି ଭାରତ, ଯାହାପରେ ତୁରନ୍ତ ସମସ୍ତ ସୁବିଧା ସୁଯୋଗ ଯୋଗାଇ ଦେବାକୁ ପ୍ରତିଶୃତି ଦେଇଛନ୍ତି ସେ ।
ଏଡସକୁ ନେଇ ସାମାଜିକ ବାଛନ୍ଦ ଭଳି ଅନେକ ଘଟଣା ସାମ୍ନାକୁ ଆସୁଥିବା ବେଳେ ଏଠି କିନ୍ତୁ ଦୃଶ୍ୟ ସମ୍ପୂର୍ଣ୍ଣ ଓଲଟା । ଗାଁଲୋକେ ଏ ପରିବାରକୁ ପର କରି ଦେଇ ନାହାଁନ୍ତି ବରଂ ପର କରିଦେଇଛି ସରକାରୀ ବ୍ୟବସ୍ଥା ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
