ଅନୁଗୋଳ: ଜିଲ୍ଲାରେ ରବିବାର ଦେଖିବାକୁ ମିଳିଛି ଏକ ଅଭାବନୀୟ ଘଟଣା । ପାଗଳା କୁକୁର କାମୁଡାରେ ବନ୍ତଳା ଥାନା ତଳଗଡ଼ ଗାଁରେ 30ରୁ ଅଧିକ ଲୋକ ଆହତ ହୋଇଛନ୍ତି । ଆହତଙ୍କୁ ଚିକିତ୍ସା ପାଇଁ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ସୂଚନା ମିଳିଛି ।
ସୂଚନା ଅନୁସାରେ ତାଳଗଡ଼ ଗାଁରେ ରବିବାର ହଠାତ୍ ଏକ କୁକୁର ଆକ୍ରମଣ କରି ଲୋକଙ୍କୁ କାମୁଡିବା ଆରମ୍ଭ କରିଥିଲା । ଗାଁର ଲୋକ ଯିଏ ଯେଉଁଠାରେ ଥିଲେ କୁକୁର ସେମାନଙ୍କୁ ଦେଖିବା ମାତ୍ରେ ଗୋଡ଼ାଇବା ସହ ପ୍ରାୟ 30ରୁ ଅଧିକ ଲୋକଙ୍କୁ କାମୁଡି ଆହତ କରିଛି । ଏହି ଆକ୍ରମଣର ଶିକାର ହୋଇ ଆହତ ହୋଇଥିବା ବ୍ୟକ୍ତିମାନେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ଚିକିତ୍ସା ପରେ ଆହତଙ୍କ ମଧ୍ୟରୁ କିଛି ଲୋକମାନେ ଘରକୁ ଫେରିଛନ୍ତି । ତେବେ ଆହତମାନଙ୍କ ମଧ୍ୟରେ ଛୋଟ ପିଲାଙ୍କଠାରୁ ଆରମ୍ଭ କରି ବୟସ୍କ ବ୍ୟକ୍ତି ଓ ମହିଳା ମଧ୍ୟ ରହିଥିବା ଜଣାପଡିଛି । ଏହି ଘଟଣା ଘଟିବା ପରେ ଗ୍ରାମର ଲୋକମାନେ ଉକ୍ତ କୁକୁରକୁ ପିଟି ପିଟି ମାରି ଦେଇଥିବା ସୂଚନା ମିଳିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
