ହାଇଦ୍ରାବାଦ: ଅଲିମ୍ପିକ୍ରେ ବ୍ୟକ୍ତିଗତ ସ୍ବର୍ଣ୍ଣ ପଦକ ଜିତିବାରେ ଦେଶର ଦ୍ବିତୀୟ ଆଥଲେଟ୍ ହୋଇ ନୀରଜ ଚୋପ୍ରା ସର୍ବକାଳୀନ ସଫଳ ଭାରତୀୟ ଅଲିମ୍ପିଆନଙ୍କ ମଧ୍ୟରେ ନିଜକୁ ସ୍ଥାନିତ କରିଛନ୍ତି । ନୀରଜ ଶନିବାର ଦିନ ପୁରୁଷ ଜାଭେଲିନ୍ ଥ୍ରୋରେ ୮୭.୫୮ ମିଟର ଶ୍ରେଷ୍ଠ ଥ୍ରୋ ସହିତ ସ୍ବର୍ଣ୍ଣ ଜିତିଛନ୍ତି । ଯାହା ହେଉଛି ଗତ ୧୦୦ ବର୍ଷରେ ଆଥଲେଟିକ୍ସରେ ପ୍ରଥମ ଅଲମ୍ପିକ୍ ପଦକ ।
ଏସିଆନ୍ ଗେମ୍ସ, କମନୱେଲଥ୍ ଗେମ୍ସ ସହ ବର୍ତ୍ତମାନ ଅଲିମ୍ପିକରେ ମଧ୍ୟ ନୀରଜ ସ୍ବର୍ଣ୍ଣ ପଦକ ଜିତିଛନ୍ତି ।
୨୦୦୮ ମସିହାର ବେଜିଂ ଅଲିମ୍ପିକ୍ସରେ ସ୍ବର୍ଣ୍ଣ ଜିତି ଭାରତୀୟ କ୍ରୀଡା ପାଇଁ ଏକ ସ୍ବର୍ଣ୍ଣିମ ଅଧ୍ୟାୟ ଲେଖିଥିଲେ ସୁଟର୍ ଅଭିନବ ବିନ୍ଦ୍ରା । ଯାହାପରେ ବିତି ଯାଇଥିଲା ୧୩ ବର୍ଷ । ସ୍ବର୍ଣ୍ଣ ପଦକର ଆଶା ନେଇ ସାରା ଦେଶ ପ୍ରତିଟି ଅଲମ୍ପିକ୍ରେ ଖେଳାଳିଙ୍କୁ ଅନାଇ ରହେ । କିନ୍ତୁ ଆଶା ସବୁବେଳେ ଆଶାରେ ହିଁ ରହିଯାଏ । ତେବେ ଏହି ବର୍ଷ ଗୁଡ଼ିକରେ ପିଭି ସିନ୍ଧୁ ଓ ସୁଶୀଲ କୁମାର ସ୍ବର୍ଣ୍ଣ ପାଇବାରୁ ଅଳ୍ପକେ ବଞ୍ଚିତ ହୋଇଥିଲେ କିନ୍ତୁ ନିଜର ପ୍ରଥମ ଅଲମ୍ପିକ୍ସ ଖେଳୁଥିବା ନୀରଜ ସ୍ବର୍ଣ୍ଣ ଜିତି ଦେଶର ସ୍ବର୍ଣ୍ଣ ପଦକର ସ୍ବପ୍ନକୁ ସାକାର କରିଛନ୍ତି ।
ଅବିଶ୍ବସନୀୟ ଭାବରେ, ନୀରଜଙ୍କର ଏହା ଡେବ୍ୟୁ ଅଲମ୍ପିକ୍ ଥିବାବେଳେ ବିନ୍ଦ୍ରା ନିଜର ତୃତୀୟ ଅଲମ୍ପିକରେ ସ୍ବର୍ଣ୍ଣ ପଦକ ପାଇଥିଲେ । ୨୦୦୦ ମସିହାରେ ଅଲିମ୍ପିକ୍ସରେ ଜଣେ ଯୁବ ସୁଟର ଭାବରେ ବିନ୍ଦ୍ରା ତାଙ୍କର ଡେବ୍ୟୁ କରିଥିଲେ ଏବଂ ୨୦୦୪ ଗେମ୍ସର ଯୋଗ୍ୟତା ପର୍ଯ୍ୟାୟରେ ରେକର୍ଡ ଭାଙ୍ଗିଥିଲେ ।
ଦୁଇଥର ଅଲିମ୍ପିକ୍ ପଦକ ବିଜେତା ସୁଶୀଲ ୨୦୧୨ ଲଣ୍ଡନ ଅଲିମ୍ପିକ୍ର ଫାଇନାଲରେ ପହଞ୍ଚିବା ପରେ ସ୍ବର୍ଣ୍ଣ ଜିତିବା ପାଇଁ ସବୁଠାରୁ ନିକଟବର୍ତ୍ତୀ ହୋଇଥିବା ଭାରତୀୟ କୁସ୍ତିଯୋଦ୍ଧା ହୋଇଥିଲେ । ତେବେ ସେ ଜାପାନର ତାତଶୁହିରୋ ୟୋନେମିତସୋଙ୍କ ଠାରୁ ପରାଜିତ ହୋଇ ରୌପ୍ୟ ପଦକ ପାଇଥିଲେ ।
ସୁଶୀଲଙ୍କ ବ୍ୟତୀତ ଦୁଇଟି ଅଲିମ୍ପିକ୍ ପଦକ ଜିତିଥିବା ଏକମାତ୍ର ଭାରତୀୟ ହୋଇଥିବା ଷ୍ଟାର ଶଟଲର ପିଭି ସିନ୍ଧୁ ରିଓ ୨୦୧୬ ରେ ମହିଳା ସିଙ୍ଗଲ୍ସ ବ୍ୟାଡମିଣ୍ଟନ ଫାଇନାଲରେ ପହଞ୍ଚିଥିଲେ, ଯେଉଁଠାରେ ସେ ସ୍ପେନର କାରୋଲିନା ମାରିନଙ୍କ ଠାରୁ ୨୧-୧୯, ୧୨-୨୧, ୧୫-୨୧ରେ ହାରି ଯାଇଥିଲେ ।
ଟୋକିଓ ଗେମ୍ସରେ ପଦକ ଜିତିବା ନେଇ ନୀରଜଙ୍କ ଠାରୁ ସମସ୍ତେ ବେଶ୍ ଆଶାୟୀ ଥିଲେ । କିନ୍ତୁ ଜର୍ମାନୀର ଜୋହାନ୍ସ ଭେଟର୍ ସ୍ବର୍ଣ୍ଣ ପଦକ ପାଇଁ ସବୁଠୁ ବଡ଼ ଦାବେଦାର ଥିଲେ । ୯୦ ମିଟର ମାର୍କ ସହ ବିଶ୍ବର ନମ୍ବର ଏକ ହେଉଛନ୍ତି ଭେଟର । କିନ୍ତୁ ଚଳିତ ଅଲମ୍ପିକରେ ନମ୍ବର ଏକ୍ ଥିବା ଭେଟର ନୀରଜଙ୍କ ୮୭.୫୮ ମିଟର ଥ୍ରୋର ଆଖ ପାଖରେ ମଧ୍ୟ ପହଁଞ୍ଚି ନଥିଲେ ।
ନୀରଜଙ୍କ ସ୍ବର୍ଣ୍ଣ ପଦକକୁ ମିଶାଇ ଏପର୍ଯ୍ୟନ୍ତ ଭାରତ ପାଖରେ ରହିଛି ମୋଟ ୧୦ଟି ସ୍ବର୍ଣ୍ଣ ପଦକ । ଯେଉଁଥିରେ କେବଳ ପୁରୁଷ ହକିର ୮ଟି ସ୍ବର୍ଣ୍ଣ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
