ନୂଆଦିଲ୍ଲୀ: ରେସଲିଂ ଫେଡେରେସନ ଅଫ୍ ଇଣ୍ଡିଆର ସଭାପତି ବ୍ରିଜ ଭୂଷଣଙ୍କ ବିରୋଧରେ ଯୌନ ନିର୍ଯାତନା ମାମଲା । ପ୍ରତ୍ୟାହୃତ ହେଲା ରେସଲରଙ୍କ ଧାରଣା । ଗତ ୩ଦିନ ଧରି ଖେଳାଳି ମାନେ ଦିଲ୍ଲୀ ଜନ୍ତରମନ୍ତରରେ ବ୍ରିଜ ଭୂଷଣଙ୍କୁ ପଦରୁ ହଠାଇବା ଦାବି କରି ଧାରଣା ପ୍ରଦର୍ଶନ କରିଥିଲେ । ଯାହା ଶୁକ୍ରବାର ବିଳମ୍ବିତ ରାତିରେ ପ୍ରତ୍ୟାହୃତ ହୋଇଥିବା ସୂଚନା ମିଳିଛି । କେନ୍ଦ୍ର କ୍ରୀଡାମନ୍ତ୍ରୀ ଅନୁରାଗ ଠାକୁରଙ୍କ ସହ ଦ୍ବିତୀୟ ଥର ଆଲୋଚନା ପରେ ବିରୋଧ ପ୍ରଦର୍ଶନ ବନ୍ଦ ହୋଇଛି । ବ୍ରିଜ ଭୂଷଣଙ୍କ ବିରୋଧରେ ଆସିଥିବା ଯୌନ ଶୋଷଣ ଅଭିଯୋଗ ନେଇ ଏକ ଟିମ ଗଠନ କରାଯାଇ ଯାଞ୍ଚ କରାଯିବ ବୋଲି କହିଛନ୍ତି କେନ୍ଦ୍ର କ୍ରୀଡାମନ୍ତ୍ରୀ ।
ଏନେଇ ରେସଲର ବଜରଙ୍ଗ ପୁନିଆ କହିଛନ୍ତି ଯେ, ''ଡବ୍ଲୁଏଫ୍ଆଇ ବିରୋଧରେ କେନ୍ଦ୍ର କ୍ରୀଡା ମନ୍ତ୍ରୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ କହିବା ପରେ କୁସ୍ତି ଯୋଦ୍ଧା ମାନେ ବିରୋଧ ପ୍ରଦର୍ଶନ ବନ୍ଦ କରିଦେଇଛନ୍ତି । ଡବ୍ଲୁଏଫ୍ଆଇ ସଭାପତି ବ୍ରିଜ ଭୂଷଣ ଶରଣ ସିଂ ମହିଳା କୁସ୍ତିଯୋଦ୍ଧାଙ୍କୁ ଯୌନ ନିର୍ଯାତନା, ପାଣ୍ଠି ହଡପ କରିବା ଏବଂ ଆଥଲେଟ୍ସଙ୍କୁ ଅସଦାଚରଣ ଅଭିଯୋଗରେ ବୁଧବାର ଠାରୁ ଏକ ବିରୋଧ ପ୍ରଦର୍ଶନ କରୁଥିଲେ ବହୁ କୁସ୍ତି ଯୋଦ୍ଧା ।
ଏନେଇ କ୍ରୀଡା ମନ୍ତ୍ରାଣାଳୟ କହିଛି ଯେ, ''କ୍ରୀଡାବିତଙ୍କୁ ଯୌନ ଶୋଷଣ, ଆର୍ଥିକ ଅନିୟମିତତା ଅଭିଯୋଗ ଉପରେ ଏକ କମିଟି ଅନୁସନ୍ଧାନ କରିବ । ଏହାସହ କମିଟି ଡବ୍ଲୁଏଫ୍ଆଇର ଦିନ ପ୍ରତିଦିନର କାର୍ଯ୍ୟ କରିବ ଓ ଖେଳାଳୀ ମାନେ ଆଣିଥିବା ଅଭିଯୋଗକୁ ବିଚାର କରିବ । ତଦାରଖ କମିଟି 4 ସପ୍ତାହ ମଧ୍ୟରେ ତଦନ୍ତ ଶେଷ କରିବ ଏବଂ ସେପର୍ଯ୍ୟନ୍ତ ଡବ୍ଲୁଏଫ୍ଆଇ ସଭାପତି ଦିନିକିଆ କାର୍ଯ୍ୟକଳାପରୁ ଦୂରେଇ ରହିବେ ଏବଂ ତଦନ୍ତରେ ସହଯୋଗ କରିବେ ।
ସ୍ବର୍ଣ୍ଣ ପଦକ ବିଜେତା ତଥା ଭାରତୀୟ ଷ୍ଟାର ମହିଳା କୁସ୍ତିଯୋଦ୍ଧା ଭିନେଶ ଫୋଗାଟ ଭାରତୀୟ କୁସ୍ତି ମହାସଂଘ ଏବଂ ଏହାର ଅଧ୍ୟକ୍ଷଙ୍କ ବିରୋଧରେ ସାଙ୍ଘାତିକ ଅଭିଯୋଗ ଆଣିଥିଲେ । କୁସ୍ତି ମହାସଂଘ ସଭାପତି ବ୍ରିଜ ମୋହନ ସିଂ ରେସଲରଙ୍କୁ ଯୌନ ଶୋଷଣ କରୁଥିବା ଅଭିଯୋଗ ହୋଇଥିଲା । ଏନେଇ ଦିଲ୍ଲୀର ଯନ୍ତରମନ୍ତରରେ ଅନେକ କୁସ୍ତିଯୋଦ୍ଧା ସଭାପତିଙ୍କ ବିରୋଧରେ ଏକାଠି ହୋଇ ବିକ୍ଷୋଭ ପ୍ରଦର୍ଶନ କରିଥିଲେ । ଏହି ବିକ୍ଷୋଭରେ ରିଓ ଅଲିମ୍ପିକ୍ସ ବିଜେତା ସାକ୍ଷୀ ମଲିକ, ସରିତା ମୋରେ, ବଜରଙ୍ଗ ପୁନିଆଙ୍କ ସମେତ ପାଖାପାଖି 30 ଜଣ କୁସ୍ତିଯୋଦ୍ଧା ସାମିଲ ହୋଇଥିଲେ ।
