ଭୁବନେଶ୍ବର: ଆସନ୍ତା 12 ତାରିଖରୁ ଭୁବନେଶ୍ୱରରେ ଆୟୋଜିତ ହେବାକୁ ଯାଉଛି ଓଡିଶା ମହିଳା ଫୁଟବଲ୍ ଲିଗ୍ 2022 । ଏହି ଟୁର୍ନାମେଣ୍ଟରେ 6ଟି ଦଳ ଭାଗ ନେଇଥିବାବେଳେ ମାର୍ଚ୍ଚ 4 ତାରିଖ ଯାଏ ଖେଳାଯିବ । ଆଜି(ଗୁରୁବାର) ଏନେଇ ଘୋଷଣା କରାଯାଇଛି ।
ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ କ୍ରୀଡା ସଚିବ ଭିନିଲ କ୍ରିଷ୍ଣା ଏବଂ ଫୁଟବଲ ଆସୋସିଏସନ ଅଫ ଓଡିଶାର ଏକ୍ଜିକ୍ୟୁଟିଭ ସେକ୍ରେଟାରୀ ଅଭିଜିତ କୁମାର ପାଲ ଏନେଇ ଘୋଷଣା କରିଛନ୍ତି । ଏଥିସହ 6 ଟି ଦଳ ପାଇଁ ଜର୍ସି ଉନ୍ମୋଚନ କରିଛନ୍ତି । ଏହି ଟୁର୍ଣ୍ଣାମେଣ୍ଟରେ ଭାରତୀୟ ମହିଳା ଫୁଟବଲ ଦଳରେ ଖେଳୁଥିବା ୨ ଫୁଟବଲ ତାରକା ପ୍ୟାରୀ ଖାଖା ଏବଂ ମନୀଷା ପାନା ଅଂଶଗ୍ରହଣ କରିବେ ।
ଏହା ମଧ୍ୟ ପଢନ୍ତୁ:- Ranji Trophy: ଅହମ୍ମଦାବାଦ ଅଭିମୁଖେ ବାହାରିଲା ଓଡିଶା କ୍ରିକେଟ ଟିମ୍
ଭୁବନେଶ୍ୱରର କଳିଙ୍ଗ ଷ୍ଟାଡିୟମ ଏବଂ କ୍ୟାପିଟାଲ ସ୍କୁଲ ଗ୍ରାଉଣ୍ଡରେ ଖେଳାଯିବ ମ୍ୟାଚ । ଆଗାମୀ ଦିନରେ ରାଜ୍ୟ ତଥା ଦେଶ ପାଇଁ ଅନେକ ପ୍ରତିଭାବାନ ଖେଳାଳି ଏହି ଲିଗ ମାଧ୍ୟମରେ ବାହାରିବେ ବୋଲି ଦୁଇ ଫୁଟବଲ ଷ୍ଟାର ଏବଂ ଫୁଟବଲ ଆସୋସିଏସନ ଅଫ ଓଡିଶାର ଅଭିଜିତ କୁମାର ପାଲ କହିଛନ୍ତି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
