ଲଣ୍ଡନ: ୟୁକ୍ରେନ ଉପରେ ରୁଷିଆର ଆକ୍ରମଣ ପାଇଁ ଚଳିତ ବର୍ଷର ମେଗା ଗ୍ରାଣ୍ଡସ୍ଲାମ ଟୁର୍ଣ୍ଣାମେଣ୍ଟରେ ଋଷିଆ ଓ ବେଲାଋସ ଖେଳାଳି ଅଂଶଗ୍ରହଣ କରିପାରିବେ ନାହିଁ । ବିଶ୍ବ ଟେନିସର ସମ୍ମାନଜନକ ଟୁର୍ଣ୍ଣାମେଣ୍ଟ ୱିମ୍ବଲଡନ(Wimbledon) ବୁଧବାର ଏକ ବଡ ଘୋଷଣା କରିଥିଲା । ତେବେ ଏହି ନିଷ୍ପତିକୁ ବିଶ୍ବର ନମ୍ବର ୧ ଟେନିସ ଖେଳାଳି ନୋଭାକ ଜୋକଭିକ(Novak Djokovic) ସମାଲୋଚନା କରିଛନ୍ତି । ଜୋକଭିକ ଏହି ନିଷ୍ପତିକୁ 'crazy' ଆଶ୍ଚର୍ଯ୍ୟକର ବୋଲି କହିଛନ୍ତି । ଏଥିସହ ସେ ନିଜେ ଜଣେ ଯୁଦ୍ଧର ସନ୍ତାନ(Child Of War) ହୋଇଥିବାରୁ କେବେ ଯୁଦ୍ଧକୁ ସମର୍ଥନ କରନ୍ତି ନାହିଁ ବୋଲି କହିଛନ୍ତି ।
ଟେନିସ ସୁପରଷ୍ଟାର ଜୋକଭିକ କହିଛନ୍ତି, "ମୁଁ କଦାପି ଯୁଦ୍ଧକୁ ସମର୍ଥନ କରିବି ନାହିଁ କାରଣ ନିଜେ ଜଣେ ଯୁଦ୍ଧର ସନ୍ତାନ । ଏହାର ପରିଣାମ କେତେ ଭୟଙ୍କର ଓ ଦୁଃଖଦାୟକ ଭଲ ଭାବେ ଜଣା । ସର୍ବିୟାରେ ୧୯୯୯ରେ କ'ଣ ଘଟିଥିଲା ଆମେ ସମସ୍ତେ ଜାଣିଛୁ । ବାଲକନ୍ସରେ ନିକଟ ଅତୀତରେ ଆମେ ଏକାଧିକ ଯୁଦ୍ଧକୁ ଦେଖିଛୁ ।"
ଋଷୀୟ ଖେଳାଳିଙ୍କ ଉପରେ ବ୍ୟାନ୍ ଅର୍ଥାତ ବିଶ୍ବ ଟେନିସ ମାନ୍ୟତାର ନମ୍ବର ୨ ଖେଳାଳି ଡାନିଲ ମେଡେଭେଡେବ ଓ ବିଶ୍ବ ମାନ୍ୟତାର ୮ନମ୍ବର ଖେଳାଳି ଆଣ୍ଡ୍ରେ ରବଲେଭ ପୁରୁଷ ଡ୍ର ପ୍ରତିଯୋଗୀତାରେ ଅଂଶଗ୍ରହଣ କରିପାରିବେ ନାହିଁ । ଏହି ନିଷ୍ପତି ଦ୍ବାରା ମହିଳା ଟେନିସ ମାନ୍ୟତାର ପଞ୍ଚଦଶ ସ୍ଥାନରେ ଥିବା ଆନାଷ୍ଟାସିଆ ପାଭଲ୍ୟୁଚେଙ୍କୋଭା ମଧ୍ୟ ପ୍ରଭାବିତ ହେବେ ।
ଅଲ ଇଂଲଣ୍ଡ ଲନ୍ ଟେନିସ କ୍ଳବ(AELTC) ପକ୍ଷରୁ ଏକ ବିଜ୍ଞପ୍ତିରେ କୁହାଯାଇଛି ଯେ, ଚମ୍ପିଆନସିପ୍ ୟୁନାଇଟେଡ କିଙ୍ଗଡମ୍ କିମ୍ବା ବିଶ୍ବର ଯେ କୌଣସି ସ୍ଥାନରେ ହେଉ ସରକାରଙ୍କ ପ୍ରୟାସର ଏକ ଅଂଶ ଭାବେ ଏହା ଆମର ଦାୟିତ୍ବ ଯେ, ଶିଳ୍ପ, କ୍ରୀଡା ଓ ଅନ୍ୟ ସଂସ୍ଥାନ ଗୁଡିକରୁ ରୁଷିଆର ବିଶ୍ବ ପ୍ରଭାବ ଯଥାସମ୍ଭବ କମ କରିବା । ଏପରି ଅନ୍ୟାୟ ଏବଂ ଅପ୍ରତ୍ୟାଶିତ ସାମରିକ ଆକ୍ରୋଶର ପରିସ୍ଥିତିରେ, ଚାମ୍ପିୟନଶିପ୍ ସହିତ ଋଷିଆ କିମ୍ବା ବେଲାଋସୀୟ ଖେଳାଳିଙ୍କ କୌଣସି ବେନିଫିଟ୍ ପାଇଁ ଯୋଗଦାନକୁ ଗ୍ରହଣ କରିବା ଗ୍ରହଣୀୟ ନୁହେଁ |
ଦୁଃଖର ସହିତ ଏହା ଘୋଷଣା କରିବାକୁ ହେଉଛି ଯେ ଋଷୀୟ ଓ ବେଲାଋଷୀୟ ଖେଳାଳିଙ୍କୁ ଚାମ୍ପିଅନସିପ ୨୦୨୨ରେ ଅଂଶଗ୍ରହଣ କରିବାକୁ ସୁଯୋଗ ଦିଆଯାଇପାରିବ ନାହିଁ । ଅଲ୍ ଇଂଲଣ୍ଡ କ୍ଳବର ଚେୟାରମ୍ୟାନ ଇଆନ ହେୱିଟ୍ କହିଛନ୍ତି, ନିର୍ଦ୍ଦିଷ୍ଟ ବ୍ୟକ୍ତିବିଶେଷଙ୍କୁ ଏହି ନିଷ୍ପତ୍ତି କଷ୍ଟ ଦେଇପାରେ ମାତ୍ର ଦୁଃଖର ସହିତ ଏହା କହିବାକୁ ପଡୁଛି ଯେ, ଋଷିଆ ରାଷ୍ଟ୍ରମୁଖ୍ୟଙ୍କ କାର୍ଯ୍ୟପାଇଁ ସେମାନେ ପ୍ରଭାବିତ ହେଉଛନ୍ତି ।"
ANI
