ବର୍ମିଂହାମ: ରାଜ୍ୟଗୋଷ୍ଠୀ କ୍ରୀଡାରେ ଭାରତୀୟ ପୁରୁଷ ହକି ଦଳର ଦମଦାର ପ୍ରଦର୍ଶନ ଦେଖିବାକୁ ମିଳିଛି । ଘାନାକୁ ଧୂଳି ଚଟାଇଛି ଭାରତୀୟ ହକି ଦଳ । ଘାନା ବିପକ୍ଷରେ ଭାରତ ବୃହତ ବିଜୟ ହାସଲ କରିଛି । ରବିବାର ପୁଲ-ବି ମ୍ୟାଚରେ 11-0 ଗୋଲରେ ଘାନାକୁ ପରାସ୍ତ କରିଛି ଭାରତ । ହର୍ମନପ୍ରୀତ ସିଂହଙ୍କ ହ୍ୟାଟ୍ରିକ ଗୋଲ ଦେଇ ବିଜୟରେ ମୁଖ୍ୟ ଭୂମିକା ତୁଲାଇଥିଲେ ।
ମ୍ୟାଚ୍ଟି ସମ୍ପୂର୍ଣ୍ଣ ଏକତରଫା ହୋଇଥିଲା । 4ଟି କ୍ବାର୍ଟରେ ଭାରତ ଗୋଲ ପରେ ଗୋଲ୍ କରି ଚାଲିଥିଲା ଭାରତ । ଘାନା ଗୋଟିଏ ବି ଗୋଲ୍ ପରିଶୋଧ କରିପାରିନଥିଲା । ପ୍ରଥମ କ୍ବାର୍ଟରର ଦ୍ବିତୀୟ ମିନିଟରେ ଅଭିଷେକ ଖାତା ଖୋଲିଥିଲେ । ଏହି ଭାଗରେ ହର୍ମନପ୍ରୀତ ଓ ସମଶେର ଗୋଟିଏ ଲେଖାଏଁ ଗୋଲ କରିଥିଲେ । ଦ୍ବିତୀୟ କ୍ବାର୍ଟରରେ ଭାରତ 2ଟି ଗୋଲ କରିଥିଲା ।
20 ମିନିଟରେ ଆକାଶଦୀପ ସିଂହ ଓ 22ମିନିଟରେ ଯୁଗରାଜ ସିଂ ଗୋଲ୍ କରିଥିଲେ । ତୃତୀୟ କ୍ବାର୍ଟରରେ ଆଉ 4ଟି ଗୋଲ କରି 9-0ରେ ଆଗୁଆ ରହିଥିଲା ଭାରତ । ପରେ ପରେ ପୁଣି ଆଉ ଦୁଇଟି ଗୋଲ କରିଥିଲା ଭାରତୀୟ ହକି ଟିମ । ଫଳରେ ଘାନା ବିପକ୍ଷରେ ଏକ ବୃହତ ବିଜୟ ହାସଲ କରିଛି ଭାରତ ।
