ନୂଆଦିଲ୍ଲୀ: ରବିବାର ଥିଲା ଜୁନିୟର ସୁଟିଂ ବିଶ୍ବକପର 2ୟ ଦିନ । ଭାରତ 2ୟ ଦିନରେ ମୋଟ 6ଟି ପଦକ ହାସଲ କରିଛି । 6ଟି ପଦକ ମଧ୍ୟରେ 2ଟି ସ୍ବର୍ଣ୍ଣ ପଦକ, 3ଟି ରୌପ୍ୟ ଓ ଗୋଟିଏ ବ୍ରୋଞ୍ଜ ସାମିଲ ରହିଛି ।
ତେବେ 2ୟ ଦିନ ଖେଳ ଶେଷ ସୁଦ୍ଧା ଭାରତ ମୋଟ 11 ପଦକ (4 ସ୍ବର୍ଣ୍ଣ, 5ଟି ରୌପ୍ୟ ଓ 2ଟି ବ୍ରୋଞ୍ଜ) ପାଇଛି । ଏହାସହ ଭାରତ ପଏଣ୍ଟ ଟେବୁଲର ଶୀର୍ଷରେ ରହିଛି । ପୁରୁଷ 50 ମିଟର ପିସ୍ତଲ ଇଭେଣ୍ଟରେ ଭାରତର ଗୌରବ ରାଣା 553 ପଏଣ୍ଟ ସହ ପ୍ରଥମ ସ୍ଥାନରେ ରହି ସ୍ବର୍ଣ୍ଣ ଜିତିଛନ୍ତି ।
ସେହିପରି ଅନ୍ୟତମ ଭାରତୀୟ ସୁଟର ଅର୍ଜୁନ ସିଂହ ଚିମା 553 ପଏଣ୍ଟ ସହ 2ୟ ସ୍ଥାନରେ ରହି ରୌପ୍ୟ ପଦକ ହାତେଇଛନ୍ତି । ମହିଳା 50 ମିଟର ପିସ୍ତଲ ଇଭେଣ୍ଟରେ ପ୍ରିୟା ରାଘବ 535 ପଏଣ୍ଟ ସହ 2ୟ ସ୍ଥାନରେ ରହି ରୌପ୍ୟ ପଦକ ହାସଲ କରିଛନ୍ତି । ସେହିପରି ବିଭୁତି ଭାଟିଆ 531 ପଏଣ୍ଟ ସହ ବ୍ରୋଞ୍ଜ ପଦକ ହାତେଇଛନ୍ତି ।
