ଭୁବନେଶ୍ବର: ସାରା ଓଡିଶାରେ ଏବେ ହକି ବିଶ୍ବକପ ଫିଭର । ତାରିଖ ଯେତେ ପାଖଉଛି ଖେଳାଳି ଓ ପ୍ରଶଂସକଙ୍କଠାରେ ଉତ୍ସାହ ସେତେ ବଢୁଛି । ଜାନୁଆରୀ ୧୩ ରୁ ୨୯ ତାରିଖ ପର୍ଯ୍ୟନ୍ତ ଖେଳାଯିବ ଏହି ମୁହାକୁମ୍ଭ । ଭୁବନେଶ୍ବର ଓ ଇସ୍ପାତ ନଗରୀ ରାଉରକେଲାରେ ମ୍ୟାଚ ହେବ । ୫ଟି ମହାଦେଶର ୧୬ ଟି ଦେଶ ଏଥିରେ ଅଂଶଗ୍ରହଣ କରିବେ । ପୁଲ Dରେ ଇଂଲଣ୍ଡ, ସ୍ପେନ ଓ ୱେଲ୍ସ ସହିତ ସ୍ଥାନ ପାଇଛି ଭାରତ । ଜାନୁଆରୀ ୧୩ ତାରିଖ ସନ୍ଧ୍ୟା ୭ ଟା ବେଳେ ସ୍ପେନ ବିପକ୍ଷରୁ ଅଭିଯାନ ଆରମ୍ଭ କରିବ ଟିମ୍ ଇଣ୍ଡିଆ । ଏନେଇ ଦଳ ମଧ୍ୟ ଘୋଷଣା ସରିଛି ।
ଆଉ 4ବର୍ଷ ପରେ ପୁଣିଥରେ ନିଜ ମା଼ଟିରେ ବିଶ୍ବକପ ଖେଳିବାକୁ ଯାଉଛି ଟିମ ଇଣ୍ଡିଆ । ଖେଳାଳି ଚୟନ ହୋଇସାରିଥିବା ବେଳେ ଭାରତ ଇଂଲଣ୍ଡ, ସ୍ପେନ ଓ ୱେଲ୍ସ ସହିତ ଲିଗ ମ୍ୟାଚ ଖେଳିବ । ତେବେ ଅଷ୍ଟ୍ରେଲିଆ ଟେଷ୍ଟ ସିରିଜରେ ସଫଳ ପ୍ରଦର୍ଶନ କରିନଥିବାରୁ ଭାରତକୁ ତାର ରଣକୌଶଳରେ ପରିବର୍ତ୍ତନ ଆଣିବା ଜରୁରୀ ହୋଇପଡିଛି ବୋଲି କହିଛନ୍ତି କ୍ରୀଡା ସମୀକ୍ଷକ ସମ୍ବିତ ମହାପାତ୍ର । ତେଣୁ ଭାରତକୁ ମିଡ ଫିଲ୍ଡ ଏବଂ ଅପରେ ପୁସ କରିବାକୁ ପଡିବ । ଡିଫେଣ୍ଡ କରିବା ପାଇଁ ଭାରତୀୟ ଦଳ ଖେଳିବା ଦରକାର ନାହିଁ ବୋଲି କହିଛନ୍ତି ସମ୍ବିତ । ଦଳର ବ୍ୟାକଲାଇନ ଭଲ ନଥିବାରୁ ମିଡ ଫିଲ୍ଡରେ କମାଲ ଦେଖାଇବାକୁ ପଡିବ । ଏହା ନିର୍ଭର କରୁଛି ହାର୍ଦ୍ଦିକ ଏବଂ ମନପ୍ରିତଙ୍କ ଉପରେ । ସେହିପରି ବ୍ୟାକଲାଇନରେ ଅମିତ ରୋହିଦାସ ଏବଂ ହରମନପ୍ରିତଙ୍କୁ କମାଲ ଦେଖାଇବାକୁ ପଡିବ । ସେହିପରି ସ୍କୋୟାର ପାସ ନ ଖେଳି ଫାଷ୍ଟ ଟାଇମର ହେବାକୁ ପଡିବ । ଆକାଶଦିପ ଏବଂ ମନଦୀପଙ୍କ ଉପରେ ଦଳ ଭରସା ରଖିଛି । ଶେଷ 3ରୁ 4ମିନିଟ ରେ ଭାରତ ଅଧିକ ଗୋଲ ଖାଉଥିବାରୁ ଫରଓ୍ବାର୍ଡ ଏବଂ ମିଡଫିଲ୍ଡ ଉପରେ ଗୁରୁତ୍ବ ଦେବା ଜରୁରୀ ହୋଇପଡିଛି ବୋଲି କହିଛନ୍ତି ଏହି କ୍ରୀଡା ସମୀକ୍ଷକ ।
ନିଜ ମାଟିରେ ପୁଣି ଥରେ ଟ୍ରଫି ହାତେଇବା ପାଇଁ ଭାରତ ପାଖରେ ସୁଯୋଗ ରହିଛି । ବିଶ୍ବକପରେ ସମସ୍ତଙ୍କ ଭୂମିକା ଅତ୍ୟନ୍ତ ଗୁରୁତ୍ବପୂର୍ଣ୍ଣ । ଡିଫେଣ୍ଡର, ମିଡ ଫିଲଡର, ଫରୱାର୍ଡ ଏବଂ ଡ୍ରାଗଫ୍ଲିକର ଭୂମିକା ଦଳରେ ମହତ୍ବପୂର୍ଣ୍ଣ ରହିଛି । ଅତୀତର ସେହି ଦଳର ଦବଦବା ରହିଛି ଯାହାର ଡ୍ରାଗ ଫ୍ଲିକର ପ୍ରଦର୍ଶନ ଉଚ୍ଚକୋଟିର ରହିଥିଲା । ତେଣୁ ଟିମ୍ ଇଣ୍ଡିଆ କ୍ଷେତ୍ରରେ ମଧ୍ୟ ଡ୍ରାଗ ଫ୍ଲିକର ଉପରେ ବିଶେଷ ଧ୍ୟାନ ଦିଆଯିବା ଦରକାର ବୋଲି କହିଛନ୍ତି ଭାରତୀୟ ହକି ଦଳର ପୂର୍ବତନ ଅଧିନାୟକ ତଥା ହକି ଇଣ୍ଡିଆ ସଭାପତି ଦିଲ୍ଲୀପ ତିର୍କୀ । ସେହିପରି ଅନ୍ତର୍ଜାତୀୟ ହକି ଖେଳାଳି ଲାଜାରୁସ ବାର୍ଲା ଭାରତୀୟ ଦଳର ଫରଓ୍ବାର୍ଡ ରଣନୀତି ଉପରେ ଗୁରୁତ୍ବ ଦେଇଛନ୍ତି ।
ଭାରତ ଶେଷ ଥର ପାଇଁ 1975 ମସିହାରେ ବିଶ୍ବକପ ଟ୍ରଫି ହାତେଇଥିଲା । ୪୮ ବର୍ଷ ପରେ ପୁଣି ଥରେ ବିଶ୍ବ ବିଜେତା ହେବା ଲକ୍ଷ୍ୟ ନେଇ ମଇଦାନକୁ ଓହ୍ଲାଇବ ଟିମ୍ ଇଣ୍ଡିଆ । ତେଣୁ ଦଳର ସମସ୍ତ ତ୍ରୁଟିକୁ ସୁଧାରି ଏଥର ବିଶ୍ବକପରେ ଇଂଲଣ୍ଡ, ସ୍ପେନ ଏବଂ ବିପକ୍ଷରେ ଭାରତ କିପରି ପ୍ରଦର୍ଶନ କରୁଛି ଏବେ ତା ଉପରେ ନଜର ।
ଇଟିଭି ଭାରତ, ଭୁବନେଶ୍ୱର
