ରାଉରକେଲା: ସୁନ୍ଦରଗଡରେ ନବନିର୍ମିତ ବିର୍ସା ମୁଣ୍ଡା ହକି ଷ୍ଟାଡିୟମକୁ ନେଇ ବହୁ ସମାଲୋଚନା କରାଯାଉଥିଲା । ଏତେ କମ ସମୟରେ ଷ୍ଟାଡିୟମ କିପରି ନିର୍ମାଣ ହେଲା ସେ ନେଇ ରାଜ୍ୟ ସରକାରଙ୍କୁ ଟାର୍ଗେଟ କରୁଥିଲେ ବିରୋଧୀ । ବିର୍ସା ମୁଣ୍ଡା ଷ୍ଟାଡିୟମ ବିଶ୍ବର ସବୁଠୁ ବଡ ହକି ଷ୍ଟାଡିୟମ ବୋଲି କହିଛନ୍ତି ଅନ୍ତର୍ଜାତୀୟ ହକି ମହାସଂଘ (ଏଫଆଇଏଚ) ସଭାପତି ତୟାବ ଇକ୍ରାମ । ବିର୍ସା ମୁଣ୍ଡା ଭଳି ଅତ୍ୟାଧୁନିକ ଷ୍ଟାଡିୟମ ସମଗ୍ର ବିଶ୍ବରେ ନାହିଁ ବୋଲି ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ତୟାବ ଇକ୍ରାମ ।
ବିର୍ସା ମୁଣ୍ଡା ଷ୍ଟାଡିୟମ ସର୍ବବୃହତ ଷ୍ଟାଡିୟମ କି ନୁହେଁ ବୋଲି କିଛି ଦିନ ହେବ ଏହାକୁ ନେଇ ବିବାଦ ଲାଗି ରହିଥିଲା । ଏଫଆଇଏଚ ସଭାପତି ଏହି ବିବାଦରେ ପୂର୍ଣ୍ଣଚ୍ଛେଦ ପକାଇଛନ୍ତି । ସେ କହିଛନ୍ତି, ଏଥିରେ କୌଣସି ଦ୍ବନ୍ଦ୍ବ ରହିବା ଉଚିତ ନୁହେଁ ଯେ ବିର୍ସା ମୁଣ୍ଡା ବିଶ୍ବର ସବୁଠୁ ବଡ ଦର୍ଶକ ଧାରଣା କ୍ଷମତା ରଖୁଥିବା ଷ୍ଟାଡିୟମ । ଏବେ ଯେତିକି ଦର୍ଶକ ଏଠାରେ ବସି ମ୍ୟାଚ ଉପଭୋଗ କରୁଛନ୍ତି ତାଠୁ ଅଧିକ ସିଟ ବ୍ୟବସ୍ଥା କରାଯାଇପାରେ । ଜାଣିବାରେ 21,800 ହଜାର ଦର୍ଶକ ଏବେ ଏଠାରେ ବସି ପାରିବେ । ଭାରତର ମ୍ୟାଚ ଦିନ କ୍ଷମତାରୁ ଅଧିକ ଦର୍ଶକ ମ୍ୟାଚ ଉପଭୋଗ କରିଥିଲେ । ଅତ୍ୟାଧୁନିକ କୌଶଳରେ ବିର୍ସାମୁଣ୍ଡା ଷ୍ଟାଡିୟମ ନିର୍ମାଣ ହୋଇଛି । ଖେଳାଳିଙ୍କ ପାଇଁ ଉନ୍ନତ ସୁବିଧା ସୁଯୋଗ ରହିଛି । ମୋ ମତରେ ଏହା ସବୁଠୁ ଗରୁତ୍ବପୂର୍ଣ୍ଣ ବୋଲି କହିଛନ୍ତି ଏଫଆଇଏଚ ସଭାପତି ।
ଏଫଆଇଏଚ ସଭାପତି ଆହୁରି କହିଛନ୍ତି, ''ମୁଁ ପୂର୍ବରୁ ଅଲିମ୍ପିକ ମ୍ୟାନେଜମେଣ୍ଟ ବିଷାରଦ ଭାବେ କାର୍ଯ୍ୟ କରିଛି କିନ୍ତୁ ଆଥଲେଟଙ୍କ ଭଳି ଏଭଳି ସୁବିଧା ସୁଯୋଗ କେଉଁଠି ଦେଖିନାହିଁ । ହକି ଖେଳାଳିଙ୍କ ପାଇଁ ଏପରି ସୁବିଧା କରିଥିବାରୁ ଓଡିଶା ସରକାରଙ୍କୁ ଧନ୍ୟବାଦ ।'' ଓଡିଶାରେ ହକିର ବିକାଶ ନେଇ ଏଫଆଇଏଚ ସଭାପତି କହିଛନ୍ତି ହକି ଇଣ୍ଡିଆ ପକ୍ଷରୁ ଓଡିଶାରେ ସ୍ବତନ୍ତ୍ର ହକି କୋଚିଂ ଡ୍ରାଇଭ କରାଯିବ ।
ପ୍ରକାଶ ଥାଉ କି, ଜାନୁଆରୀ 5 ତାରିଖରେ ଅନ୍ତର୍ଜାତୀୟ ବିର୍ସା ମୁଣ୍ଡା ହକି ଷ୍ଟାଡିୟମର ଉଦଘାଟନ କରିଥିଲେ ମୁଖ୍ୟମନ୍ତ୍ରୀ । 15 ମାସ ଅବଧିରେ ଏହି ଷ୍ଟାଡିୟମ ନିର୍ମିତ ହୋଇଛି । 260 କୋଟି ଟଙ୍କା ବ୍ୟୟରେ ବିର୍ସା ମୁଣ୍ଡ ହକି ଷ୍ଟାଡିୟମ ନିର୍ମାଣ ହୋଇଛି । ଉଭୟ ଖେଳାଳି ଓ ଦର୍ଶକଙ୍କ ନିମନ୍ତେ ସର୍ବୋତ୍ତମ ସୁବିଧା ସହ ଭିନ୍ନକ୍ଷମଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି ।
ଇଟିଭି ଭାରତ, ସୁନ୍ଦରଗଡ
