ମାର୍ଲୋ (ୟୁକେ): ଶେଷ ମ୍ୟାଚ ବି ଡ୍ର । ସିରିଜ ବି ଡ୍ର । ଏମିତି ଚମତ୍କାର ପ୍ରଦର୍ଶନ କରିଛି ଭାରତୀୟ ମହିଳା ଦଳ । ଶୁକ୍ରବାର ସମାପ୍ତ ହୋଇଥିବା ଭାରତର ଇଂଲଣ୍ଡ ଗସ୍ତର ଶେଷ ମ୍ୟାଚ 2-2ରେ ବରାବର ରହିଛି । ତେବେ ଏହି ଗସ୍ତରେ 3ଟି ମ୍ୟାଚ ଅମୀମାଂସିତ ରହିଥିବାବେଳେ ଭାରତ ଓ ବ୍ରିଟେନ୍ ଗୋଟିଏ ଲେଖାଏଁ ମ୍ୟାଚ୍ ଜିତିଛନ୍ତି । ଫଳରେ ପାଞ୍ଚମ୍ୟାଚ ବିଶିଷ୍ଟ ଏହି ସିରିଜ 1-1ରେ ବରାବର ରହିଛି ।
ଆଜି ଖେଳାଯାଇଥିବା ବ୍ରିଟେନ ବିପକ୍ଷ ମ୍ୟାଚ 2-2 ଗୋଲରେ ବରାବର ରହିଛି । ମ୍ୟାଚର ପ୍ରଥମ 8 ମିନିଟରେ ଭାରତ ପକ୍ଷରୁ ଗୋଲ ଦେଇଥିଲେ ନଭଜୋତ୍ କୌର୍ । ସେହିପରି ମ୍ୟାଚ 48ତମ ମିନିଟରେ ଅନ୍ୟ ଏକ ଗୋଲ ଦେଇ ଭାରତକୁ ଟପରେ ରଖିଥିଲେ ଗୁରଜିତ୍ କୌର୍ । ତେବେ ମ୍ୟାଚର 3ଟି କ୍ବାର୍ଟର ପର୍ଯ୍ୟନ୍ତ ଘରୋଇ ବ୍ରିଟେନ କୌଣସି ଗୋଲ ଦେଇପାରି ନଥିଲା ।
ମାତ୍ର ମ୍ୟାଚର 55ତମ ମିନିଟରେ ଏଲିଜାବେଥ୍ ନିଲ୍ ଓ ମ୍ୟାଚର ଠିକ୍ ଶେଷ ମୁହୁର୍ତ୍ତରେ ଆନ୍ନା ଟୋମାନ୍ ଗୋଟିଏ ଲେଖାଏଁ ଗୋଲ ହିଟ କରି ଘରୋଇ ଦଳକ ସପକ୍ଷରେ ମ୍ୟାଚ ଆଣିଥିଲେ । ଉଭୟ ଦଳର ଦୁଇ ଦୁଇଟି ଗୋଲ ହେବା ଫଳରେ ମ୍ୟାଚ ବରାବର ରହିଥିଲା ।
