ହାଇଦ୍ରାବାଦ: ଜାରି ରହିଥିବା ଆଇସିସି ବିଶ୍ବକପ୍ ୨୦୨୩ରେ ୮ ମ୍ୟାଚ୍ରୁ ୮ ବିଜୟ ସହ ଭାରତ ମଜଭୁତ ସ୍ଥିତିରେ ରହିଛି । ଦଳର ସମସ୍ତ ବିଭାଗ ବେଶ ଶକ୍ତିଶାଳୀ ରହିଛି । ତେବେ ମଧ୍ୟକ୍ରମ ବ୍ୟାଟର ଶ୍ରେୟସ ଆୟର ୮ ମ୍ୟାଚ୍ରୁ ୪୮.୮୩ ହାରରେ ୨୯୩ ରନ ସହ ଦଳର ସଫଳତାରେ ବେଶ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରିଛନ୍ତି । ହେଲେ ଆୟର ସଟ୍ ବଲ୍ ବିପକ୍ଷରେ ବେଶ ସଙ୍ଘର୍ଷ କରୁଥିବା ଦେଖିବାକୁ ମିଳୁଛି ବୋଲି ଏବେ ଚର୍ଚ୍ଚା ଆରମ୍ଭ ହୋଇଛି । ଯେଉଁ ଚର୍ଚ୍ଚାକୁ ନିକଟରେ ଏକ ପ୍ରେସ୍ କନ୍ଫରେନ୍ସ ଜରିଆରେ ଖଣ୍ଡନ କରିଥିଲେ ନିଜେ ଆୟର । ଏବେ ତାଙ୍କ ବାପା ସନ୍ତୋଷ ଆୟର ମଧ୍ୟ ଶ୍ରେୟସଙ୍କ କଥାକୁ ଦୋହରାଇଛନ୍ତି । ଶ୍ରେୟସ ସଟ୍ ବଲ୍ ବିପକ୍ଷରେ ସଙ୍ଘର୍ଷ କରିବା ଏକ ମିଛ କାହାଣୀ ବୋଲି ଇଟିଭି ଭାରତ ସହ ଏକ ସାକ୍ଷାତକାରରେ କହିଛନ୍ତି ସନ୍ତୋଷ ଆୟର ।
ଇଟିଭି ଭାରତ ସହ ଏହି ସାକ୍ଷାତକାର ବେଳେ ଶ୍ରେୟସଙ୍କ ବାପା ସନ୍ତୋଷ କହିଛନ୍ତି, "ଶ୍ରେୟସ ସଟ୍ ବଲ୍ ଆଗରେ ସଙ୍ଘର୍ଷ କରୁଥିବା ଏକ ମିଛ କାହାଣୀ । ସେ ଜଣେ ଭଲ ଖେଳାଳି । ସବୁ ଖେଳାଳିଙ୍କ ଖେଳରେ କିଛି ସକରାତ୍ମକ ଓ କିଛି ନକାରାତ୍ମକ କଥା ରହିଥାଏ । ହେଲେ ତାଙ୍କୁ ଆଗକୁ ବଢ଼ି ଏହା ଉପରେ ଧ୍ୟାନ ଦେବାକୁ ହେବ ।" ୱାଙ୍ଖେଡେରେ ଶ୍ରୀଲଙ୍କା ବିପକ୍ଷ ମ୍ୟାଚ୍ରେ ଶ୍ରେୟସ ୮୨ ରନର ପାଳି ଖେଳିଥିଲେ ଏବଂ ଦଳକୁ ୩୦୦ ରନ ପାର କରିବାରେ ସହାୟକ ହୋଇଥିଲେ । ଏନେଇ ତାଙ୍କ ବାପା କହିଛନ୍ତି, "ଭାରତ ପାଇଁ ଏହି ମ୍ୟାଚ୍ରେ ସେ ସୁନ୍ଦର ପ୍ରଦର୍ଶନ କରିଥିଲେ । ଶ୍ରେୟସଙ୍କ ପାଳି ଦଳକୁ ଏକ ବଡ଼ ସ୍କୋର କରିବାରେ ସହାୟକ ହୋଇଥିଲା । ଏହା ପୂର୍ବରୁ କିଛି ମ୍ୟାଚ୍ରେ ସେ ଅଳ୍ପ ସ୍କୋର ସଂଗ୍ରହ କରି ଏକ ଚାପ ପରିସ୍ଥିତି ଭିତରେ ଗତି କରୁଥିଲେ । ମୈଦାନରେ ଦର୍ଶକଙ୍କ ଭିଡ଼ ଓ ମିଡିଆ ତାଙ୍କୁ କିଛି ମାତ୍ରାରେ ପ୍ରଭାବିତ କରିଥିଲା । ହେଲେ ସେହି ଭିତରୁ ବାହାରିବା ପାଇଁ ସେ ଦୃଢ଼ ସଂକଳ୍ପ ନେଇ ସଫଳ ହୋଇଛନ୍ତି ।
ଏହା ମଧ୍ୟ ପଢ଼ନ୍ତୁ...World Cup 2023: ସଟ୍ ବଲକୁ ନେଇ ସମସ୍ୟା ନାହିଁ, ନିଜ କୌଶଳ ଉପରେ ଭରସା ଅଛି କହିଲେ ଶ୍ରେୟାସ
ଆହତ ସମସ୍ୟା କାରଣରୁ ଶ୍ରେୟସ ଦୀର୍ଘ ସମୟ ଧରି ଖେଳରୁ ଦୂରରେ ରହି ବେଙ୍ଗାଲୁରୁର ଜାତୀୟ କ୍ରିକେଟ୍ ଏକାଡେମୀରେ ସମୟ କାଟିଥିଲେ । ହେଲେ ଏହି ସମୟରେ ତାଙ୍କ ପରିବାର ମଧ୍ୟ ତାଙ୍କୁ ଉତ୍ସାହିତ କରିଥିଲେ ଏବଂ ଏନ୍ସିଏର ଡାକ୍ତର ଏବଂ ଫିଜିଓ ତାଙ୍କୁ ଯଥାଶୀଘ୍ର ସୁସ୍ଥ ହେବାରେ ସାହାଯ୍ୟ କରିଥିଲେ ବୋଲି ତାଙ୍କ ବାପା ସନ୍ତୋଷ ପ୍ରକାଶ କରିଛନ୍ତି । ସେ କହିଛନ୍ତି, "ଆହତ କାରଣରୁ ସେ ଦୀର୍ଘ ସମୟ ଧରି ଖେଳ ଠାରୁ ଦୂରରେ ରହିବାରୁ ଶ୍ରେୟସ୍ ଏକ ଖରାପ ପର୍ଯ୍ୟାୟ ଦେଇ ଗତି କରିଥିଲେ । କିନ୍ତୁ କାର୍ଯ୍ୟଭାର ବୃଦ୍ଧି ସହିତ ଆଘାତ ଖେଳର ଏକ ଅବିଚ୍ଛେଦ୍ୟ ଅଙ୍ଗ । କଠିନ ସମୟକୁ ଅତିକ୍ରମ କରିବା ପାଇଁ ଆମେ ତାଙ୍କୁ ସମର୍ଥନ କରିଥିଲୁ । ଏଥିସହ ତାଙ୍କ ସୁସ୍ଥ ହେବାରେ ଏନ୍ସିଏ ଡାକ୍ତରମାନେ ମଧ୍ୟ ତାଙ୍କୁ ସାହାଯ୍ୟ କରିଥିଲେ । ଏକ ପ୍ରଭାବଶାଳୀ ପ୍ରତ୍ୟାବର୍ତ୍ତନ ପାଇଁ ତାଙ୍କୁ ସମର୍ଥନ କରିଥିବାରୁ ଚୟନକର୍ତ୍ତା ଏବଂ ଭାରତୀୟ ଦଳ ପରିଚାଳନାକୁ ମଧ୍ୟ ଧନ୍ୟବାଦ ।"
ପ୍ରକାଶ ଥାଉ, ରବିବାର କୋଲକାତାର ଇଡେନ୍ ଗାର୍ଡେନ୍ସରେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ରେ ମଧ୍ୟ ଆୟର ୭୭ ରନର ଦମଦାର ପାଳି ଖେଳିଥିଲେ । ଏହି ମ୍ୟାଚ୍ରେ ପିଚ୍ ବହୁତ ଧିମା ଥିଲା । ବିରାଟ କୋହଲିଙ୍କ ସହ ବ୍ୟାଟିଂ କରି ସେ ୭୭ ରନ କରି ଆଉଟ୍ ହୋଇଥିଲେ । ଏହି ପାଳିରେ ସେ ୭ ଚୌକା ଓ ୨ ଛକା ମଧ୍ୟ ମାରିଥିଲେ । ଏହି ମ୍ୟାଚ୍ରେ କୋହଲିଙ୍କ ଶତକ ପରେ ତାଙ୍କର ସ୍କୋର ଦ୍ବିତୀୟ ସର୍ବାଧିକ ଥିଲା । କାରଣ ଅନ୍ୟ କୌଣସି ବ୍ୟାଟର ଏହି ପିଚ୍ରେ ଅର୍ଦ୍ଧଶତକ ମଧ୍ୟ ହାସଲ କରିବାରେ ଅସମର୍ଥ ରହିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
