କାନପୁର: ଏଠାରେ ଖେଳାଯାଉଥିବା ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ପ୍ରଥମ ଟେଷ୍ଟର ପ୍ରଥମ ଦିନ ଭାରତ ନାମରେ ହୋଇଛି । ଡେବ୍ୟୁ(debut) ଟେଷ୍ଟ ଖେଳୁଥିବା ଶ୍ରେୟସ ଆୟର ଓ ଅଲରାଉଣ୍ଡର ରବିନ୍ଦ୍ର ଜାଡେଜାଙ୍କ ଅର୍ଦ୍ଧଶତକୀୟ ଇଂନିସ ବଳରେ ପ୍ରଥମ ଦିନ ଷ୍ଟମ୍ପ ଅପସାରଣ ସୁଦ୍ଧା ଭାରତ 258/4 ସହ ଦୃଢ ସ୍ଥିତିରେ ରହିଛି ।
ଖେଳ ଶେଷ ହେବାବେଳକୁ ଶ୍ରେୟସ ଆୟର ୭୫* ଓ ରବିନ୍ଦ୍ର ଜାଡେଜା ୫୦* ରନ୍ କରି କ୍ରିଜ୍ରେ ଅପରାଜିତ ଅଛନ୍ତି ।
୧୫୪/୪ରୁ ତୃତୀୟ ତଥା ଶେଷ ସେସନର ଖେଳ ଆରମ୍ଭ କରିଥିଲେ ଆୟର ଓ ଜାଡେଜା । ଇଂନିସର ୬୮ତମ ଓଭରରେ ଅର୍ଦ୍ଧଶତକ ପୂରଣ କରିଥିଲେ ଆୟର ।
ସେହିପରି ଉଭୟ ଧୈର୍ଯ୍ୟର ସହିତ ବ୍ୟାଟିଂ କରି ପ୍ରଥମ ଦିନ ଖେଳ ଶେଷ ସୁଦ୍ଧା ଦଳକୁ ଆଉ କୌଣସି କ୍ଷତି ପହଞ୍ଚିବାକୁ ଦେଇନଥିଲେ ।
ପୂର୍ବରୁ ପ୍ରଥମ ଟେଷ୍ଟର ଦ୍ବିତୀୟ ସେସନରେ ନ୍ୟୁଜିଲାଣ୍ଡ ବୋଲର ଘାତକ ପ୍ରଦର୍ଶନ ସହ ୩ଟି ଗୁରୁତ୍ବପୂର୍ଣ୍ଣ ୱିକେଟ ହାସଲ କରିଥିଲେ । ଚେତେଶ୍ବର ପୂଜାରା, ଶୁଭମନ ଗିଲ୍ ଓ କ୍ୟାପଟେନ ଅଜିଙ୍କ୍ୟ ରାହାଣେ ବଡ ସ୍କୋର କରିବାରେ ବିଫଳ ହୋଇଥିଲେ ।
ଓପନର ମୟଙ୍କ ଅଗ୍ରୱାଲ ଶୀଘ୍ର ଆଉଟ୍ ହେବାପରେ ପୂଜାରା ଓ ଗିଲ୍ ଅର୍ଦ୍ଧଶତକୀୟ ଭାଗିଦାରୀ ସହ ଭାରତୀୟ ଇଂନିସକୁ ଆଗକୁ ବଢାଇଥିଲେ ।
ସଂକ୍ଷିପ୍ତ ସ୍କୋର: ଭାରତ ୨୫୮/୪ (ଶ୍ରେୟସ ଆୟର୭୫*, ରବିନ୍ଦ୍ର ଜାଡେଜା ୫୦*, କେଲ୍ ଜେମିଏସନ ୩-୪୭) ବନାମ ନ୍ୟୁଜିଲାଣ୍ଡ ।
ବ୍ୟୁରୋ ରିପୋର୍ଟ, ଇଟିଭି ଭାରତ
