ଶିବମୋଗା(କର୍ଣ୍ଣାଟକ): ପୂର୍ବତନ କର୍ଣ୍ଣାଟକ ମୁଖ୍ୟମନ୍ତ୍ରୀ ୟେଦିୟୁରପ୍ପାଙ୍କ ଏକ ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ନିଜ କାର୍ ଭିତରେ ଥିବା LCD ସ୍କ୍ରିନ୍ରେ ଆଇପିଏଲ ମ୍ୟାଚ୍ ଦେଖୁଥିବାର ସେ ନଜର ଆସିଛନ୍ତି । ତେବେ ଭେଟେରାନ ବିଜେପି ନେତା ୟେଦିୟୁରପ୍ପା, ବିରାଟ କୋହଲିଙ୍କ ନେତୃତାଧୀନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(RCB)ର ଜଣେ ବଡ ଫ୍ୟାନ୍ ବୋଲି ଜଣାପଡିଛି ।
ଶୁକ୍ରବାର ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଶେଷ ଲିଗ୍ ପର୍ଯ୍ୟାୟ ମ୍ୟାଚ୍ ଖେଳୁଥିଲା ବାଙ୍ଗାଲୋର । ସଂଘର୍ଷପୂର୍ଣ୍ଣ ମୁକାବିଲାରେ ଶେଷ ବଲ୍ରେ ବିଜୟ ପାଇଁ RCB ୫ ରନ୍ ଆବଶ୍ୟକ କରୁଥିବାବେଳେ, ୱିକେଟ କିପର ବ୍ୟାଟର ଶ୍ରୀକର ଭାରତ ଛକା ମାରି ଟିମକୁ ବିଜୟୀ କରାଇଥିଲେ ।
ୟେଦିୟୁରପ୍ପାଙ୍କ କାର୍ ବାହାରେ ବହୁ ସଂଖ୍ୟାରେ ଭିଡ ଜମିଥିଲେ ମଧ୍ୟ ମ୍ୟାଚ୍ରୁ ସେ ନଜର ହଟାଇନଥିଲେ । କାର୍ରେ ଥିବା LCD ସ୍କ୍ରିନକୁ ଏକଲୟରେ ଚାହିଁରହିଥିଲେ ।
କ୍ରିକେଟ ଫ୍ୟାନ୍ସ ଭେଟେରାନ ନେତାଙ୍କ ଏହି ସ୍ପିରିଟ୍କୁ ପସନ୍ଦ କରିବା ସହ ପ୍ରଶଂସା କରିଛନ୍ତି । ନିଜର ବ୍ୟସ୍ତବହୁଳ ରାଜନୈତିକ କାର୍ଯ୍ୟସୂଚୀ ମଧ୍ୟରେ ଟିକିଏ ଫୁରସତ୍ରେ ମଧ୍ୟ ସେ କ୍ରିକେଟ ମ୍ୟାଚ୍ ଦେଖିବାରେ ବ୍ୟସ୍ତ ରହିଛନ୍ତି । ଏଥିରୁ ତାଙ୍କର କ୍ରିକେଟ ପ୍ରତି ଥିବା ବିଶେଷ ରୁଚି ସ୍ପଷ୍ଟ ହେଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
