ଦୁବାଇ: ଆପିଏଲର ୪୯ତମ ମ୍ୟାଚରେ ସାମ୍ନାସାମ୍ନି ହୋଇଥିଲେ କୋଲକାତା ଓ ହାଇଦ୍ରାବାଦ । ସନରାଇଜର୍ସ ହାଇଦ୍ରାବାଦକୁ ୬ ୱିକେଟରେ ପରାସ୍ତ କରିଛି କେକେଆର । ରବିବାର ଖେଳାଯାଇଥିବା ଲୋ ସ୍କୋରିଂ ମ୍ୟାଚରେ କେକେଆର ବିଜୟ ହାସଲ କରି ପ୍ଲେ ଆଫ ଆଡକୁ ପାଦେ ଆଗେଇଛି ।
ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୮ ୱିକେଟ ହରାଇ ୧୧୫ ରନ୍ ସଂଗ୍ରହ କରିଥିଲା ହାଇଦ୍ରାବାଦ । ଫଳରେ KKR ସାମ୍ନାରେ ୧୧୬ ରନ୍ର ବିଜୟ ଲକ୍ଷ୍ୟ ରହିଥିଲା । ସଂପୂର୍ଣ୍ଣ ମ୍ୟାଚ୍ରେ KKR ବୋଲରଙ୍କ ପ୍ରଭାବୀ ପ୍ରଦର୍ଶନ ଦେଖିବାକୁ ମିଳିଥିଲା । SRHର କୌଣସି ବ୍ୟାଟ୍ସମ୍ୟାନ ବଡ ସଟ୍ ଖେଳିବାରେ ସଫଳ ହୋଇପାରିନଥିଲେ । କ୍ୟାପଟେନ ୱିଲିୟମସନ ସର୍ବାଧିକ ୨୬ ଓ ଅବଦୁଲ ସମାଦ ଶେଷ ଭାଗରେ ୨୫ ରନ୍ର ଇଂନିସ ଖେଳିଥିଲେ ।
ପ୍ରିୟମ ଗର୍ଗ ୨୧ ରନ୍ର ଯୋଗଦାନ କରିଥିଲେ । ତେବେ ଏହା ବ୍ୟତୀତ ଅନ୍ୟ ସମସ୍ତ ଖେଳାଳି ନିରାଶ କରିଥିଲେ । ଓପନର ଜେସନ ରୟ ୧୦ ଓ ରିଦ୍ଧିମାନ ଶାହା 0ରେ ଆଉଟ୍ ହୋଇଥିଲେ । ଅନ୍ୟପଟେ କୋଲକାତା ବୋଲର କଞ୍ଜୁସି ବୋଲିଂ ସହ ନିୟମିତ ବ୍ୟବଧାନରେ ୱିକେଟ ଅକ୍ତିଆର କରିଥିଲେ । ସୁନୀଲ ନାରିନ ୱିକେଟ ହାସଲ କରିନଥିଲେ ମଧ୍ୟ ସବୁଠୁ ଅଧିକ କଞ୍ଜୁସିଂ ବୋଲିଂ ସହ ମାତ୍ର ୧୨ ରନ୍ ବ୍ୟୟ କରିଥିଲେ । ଟିମ ସାଉଦୀ, ଶିବମ ମାବି ଓ ବରୁଣ ଚକ୍ରବର୍ତ୍ତୀ ଦୁଇଟି ଲେଖାଏଁ ୱିକେଟ ହାସଲ କରିଥିଲେ । ସାକିବ-ଅଲ ହସନଙ୍କୁ ଗୋଟିଏ ୱିକେଟ ମିଳିଛି ।
୧୧୬ରନ ବିଜୟ ଲକ୍ଷ୍ୟ ନେଇ ପଡିଆକୁ ଓହ୍ଲାଇଥିଲା କେକେଆର ଟିମ । ଛୋଟିଆ ଟାର୍ଗେଟ ଥିବାରୁ କୋଲକାତାକୁ ସେତେଟା କଷ୍ଟ କରିବାକୁ ପଡି ନଥିଲା । ଦଳ ପକ୍ଷରୁ ଓପନର ଶୁବମନ ଗିଲ ୫୭ ରନର ଅର୍ଦ୍ଧଶତକ କରିଥିଲେ । ଅନ୍ୟମାନଙ୍କ ମଧ୍ୟରେ ନୀତୀଶ ରାଣା ୨୫, ଭେଙ୍କଟେଶ ଆୟାର ୮ରନ, ରାହୁଲ ତ୍ରିପାଠୀ ୭ରନ କରି ଆଉଟ ହୋଇଥିଲେ । ଦିନେଶ କାର୍ତ୍ତିକ ୧୮ରନ ଓ ମୋର୍ଗାନ ୨ ରନ କରି ଅପରାଜିତ ରହିଥିଲେ । ପରିଣାମ ସୂରୁପ ଦଳ ୧୯.୪ ଓଭରରେ ୪ ୱିକେଟ ହରାଇ ଏହି ସହଜ ବିଜୟ ହାସଲ କରି ନେଇଛି । ପଏଣ୍ଟ ଟେବୁଲରେ କେକେଆର ଚତୁର୍ଥ ସ୍ଥାନ ବଜାୟ ରଖିଛି । ଏହା ସହିତ କୋଲକାତା ଆଶା ଉଜ୍ଜୀବିତ ହୋଇଛି ।
ବ୍ୟୁରୋ ରିପୋର୍ଟ,ଇଟିଭି ଭାରତ
