ମୁମ୍ବାଇ: ୱାଙ୍ଖେଡେରେ ମୁମ୍ବାଇର ଉତ୍କଣ୍ଠାପୂର୍ଣ୍ଣ ବିଜୟ । ପ୍ଲେ ଅଫ ଆଶା ଉଜ୍ଜୀବିତ ରଖିବା ପାଇଁ ଆଜି ଘରୋଇ ମୈଦାନରେ ସନରାଇଜର୍ସ ହାଇଦ୍ରାବାଦକୁ ଭେଟିଥିଲା ମୁମ୍ବାଇ ଇଣ୍ଡିଆନ୍ସ । ପ୍ରଥମେ ବ୍ୟାଟିଂ କରି ହାଇଦ୍ରାବାଦ ୨୦୦ ରନର ବିଶାଳ ସ୍କୋର କରିଥିଲା । ତେବେ କାମେରନ ଗ୍ରୀନ ଓ ରୋହିତ ଶର୍ମାଙ୍କ ଧୂଆଁଧାର ଇନିଂସ ବଳରେ ଏହି ବିଜୟଲକ୍ଷ୍ୟକୁ ୧୮ ଓଭରରେ ହାସଲ କରିନେଇଛି ମୁମ୍ବାଇ ଇଣ୍ଡିଆନ୍ସ ।
ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇ ଧୂଆଁଧାର ପାଳି ଆରମ୍ଭ କରିଥିଲା ହାଇଦ୍ରାବାଦ । ଉଭୟ ପ୍ରାରମ୍ଭିକ ବ୍ୟାଟର ବିବ୍ରାନ୍ତ ଶର୍ମା ଓ ମୟଙ୍କ ଅଗ୍ରୱାଲ ମୁମ୍ବାଇ ବୋଲରଙ୍କୁ ପ୍ରଥମରୁ ହିଁ ଆକ୍ରାମକ ଉପାୟରେ ଖେଳିଥିଲେ । ଦଳୀୟ ସ୍କୋର୍ ୪୦ ରନ ହୋଇଥିବା ବେଳେ ୪୭ ବଲରୁ ୯ ଚୌକା ଓ ୨ ଛକା ବଳରେ ୬୯ ରନ କରି ପ୍ରଥମେ ଆଉଟ ହୋଇଥିଲେ ବିବ୍ରାନ୍ତ ଶର୍ମା । ଏହାପରେ ୪୬ ବଲରୁ ୪ ଛକା ଓ ୮ ଚୌକା ବଳରେ ଦୃତ ୮୩ ରନ କରି ଆଉଟ ହୋଇଥିଲେ ମୟଙ୍କ ଅଗ୍ରୱାଲ । ଏହାପରେ କିନ୍ତୁ ଅନ୍ୟ କୌଣସି ବ୍ୟାଟର ଆଶାନୁରୂପ ପ୍ରଦର୍ଶନ କରିପାରିନଥିଲେ । ଅଧିନାୟକ ମାର୍କ୍ରମଙ୍କ ୧୩ ଓ ହେନରିଚ କ୍ଲାସିନଙ୍କ ୧୮ ରନର ପାଳି ବଳରେ ଦଳ ନିର୍ଦ୍ଧାରିତ ୨୦ ଓଭରରେ ୫ ୱିକେଟ ହରାଇ ୨୦୦ ରନରେ ଦଳକୁ ପହଞ୍ଚାଇଥିଲେ ।
ମୁମ୍ବାଇ ପକ୍ଷରୁ ଆକାଶ ମାଢୱାଲ ସର୍ବାଧିକ ୪ ୱିକେଟ ସଫଳତା ହାସଲ କରିଥିଲେ । ତେବେ ସେ ୪ ଓଭରରୁ ୩୭ ରନ ବ୍ୟୟ କରିଥିଲେ । କ୍ରିସ ଜୋର୍ଦାନ ୪ ଓଭରରେ ୪୨ ରନ ଖର୍ଚ୍ଚ କରିଥିଲେ ମଧ୍ୟ ଗୋଟିଏ ସଫଳତା ପାଇଥିଲେ । ଅନ୍ୟ କୌଣସି ବୋଲର ଆଶାନୁରୂପ ପ୍ରଦର୍ଶନ କରିପାରିନଥିଲେ । କ୍ୟାମେରନ ଗ୍ରୀନଙ୍କ ବ୍ୟତୀତ ପ୍ରାୟ ସମସ୍ତ ବୋଲର ଦଳ ପାଇଁ ମହଙ୍ଗା ସାବ୍ୟସ୍ତ ହୋଇଥିଲେ ।
