ନୂଆଦିଲ୍ଲୀ: ପଞ୍ଜାବ ବିପକ୍ଷରେ ମ୍ୟାଚ ହାରି ପ୍ରଥମ ଟିମ ଭାବେ ଆଇପିଏଲ 2023 ପ୍ଲେ ଅଫ ରେସରୁ ବାଦ ପଡ଼ିଲା ଦିଲ୍ଲୀ । ଆଜି ଘରୋଇ ଗ୍ରାଉଣ୍ଡରେ ପଞ୍ଜାବ କିଙ୍ଗସ ନିକଟରୁ 31 ରନରେ ପରାଜୟ ବରଣ କରିଛି ଦିଲ୍ଲୀ କ୍ୟାପିଟାଲ୍ସ । ପ୍ରଥମେ ବ୍ୟାଟିଂ କରି ବ୍ୟାଟିଂ ବିପର୍ଯ୍ୟୟ ସତ୍ତ୍ୱେ ପ୍ରଭସିମ୍ରନ ସିଂହଙ୍କ ଶତକୀୟ ପାଳି ବଳରେ ପଞ୍ଜାବ 167 ରନ କରିଥିଲା । ତେବେ ଏହି ବିଜୟ ଲକ୍ଷ୍ୟର ପିଛା କରି 136 ରନରେ ଅଟକି ଯାଇଥିଲା ଦିଲ୍ଲୀ କ୍ୟାପିଟାଲ୍ସ ।
ପ୍ରଥମେ ବ୍ୟାଟିଂ କରିବାକୁ ଆସି ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା ପଞ୍ଜାବ କିଙ୍ଗସ । ଅଧିନାୟକ ଶିଖର ଧାୱନ (7) ଓ ଲିଭିଙ୍ଗଷ୍ଟୋନ (4)ଙ୍କୁ ପାଭିଲିୟନ ଫେରାଇଦେିଥିଲେ ଈଶାନ୍ତ ଶର୍ମା । ଜିତେଶ ଶର୍ମା ମଧ୍ୟ କେବଳ 5 ରନ ହିଁ କରିପାରିଥିଲେ । ତେବେ ଦଳ ପକ୍ଷରୁ ସାମ କରନ 20 ଓ ସିକନ୍ଦର ରାଜା 11 ରନ କରିଥିଲେ । ତେବେ ପଞ୍ଜାବ କରିଥିବା 167 ରନରୁ ଏକାକୀ 103 ରନ କରିଥିଲେ ପ୍ରାରମ୍ଭିକ ବ୍ୟାଟର ପ୍ରଭସିମ୍ରନ ସିଂହ । ଗୋଟିଏ ପଟେ ଦଳର ବ୍ୟାଟିଂ ବିପର୍ଯ୍ୟୟ ଘଟି ଚାଲିଥିବା ବେଳେ ଅନ୍ୟପଟେ ସେ ପାଳି ସମ୍ଭାଳି ଦଳକୁ ଏକ ମଜବୁତ ସ୍ଥିତିକୁ ନେଇ ନିଜ ଆଇପିଏଲ କ୍ୟାରିୟରର ପ୍ରଥମ ଶତକ ହାସଲ କରିଥିଲେ ।
ସେପଟେ ଦିଲ୍ଲୀ ପକ୍ଷରୁ ଶୃଙ୍ଖଳିତ ବୋଲିଂ ଦେଖିବାକୁ ମିଳିଥିଲା । ମିଚେଲ ମାର୍ଶଙ୍କୁ ଛାଡ଼ିଦେଲେ ଅନ୍ୟ ସମସ୍ତ ବୋଲର ଦେଖିଚାହିଁ ବୋଲିଂ କରିଥିଲେ । ଈଶାନ୍ତ ଶର୍ମାଙ୍କୁ ସର୍ବାଧିକ 2ଟି ୱିକେଟ ମିଳିଥିଲା । ସେ 3 ଓଭରରେ 27 ରନ ଖର୍ଚ୍ଚ କରିଥିଲେ । ଅନ୍ୟମାନଙ୍କ ମଧ୍ୟରେ ଅକ୍ଷର ପଟେଲ, ପ୍ରବୀଣ ଦୁବେ, କୁଲଦୀପ ଯାଦବ ଓ ମୁକେଶ କୁମାର ଗୋଟିଏ ଲେଖାଏଁ ସଫଳତା ହାତେଇଥିଲେ ।
