ଦୁବାଇ: ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଜାରି ରହିଛି ଚେନ୍ନାଇ ସୁପର କିଙ୍ଗ୍ସ ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଆଇପିଏଲ ୨୦୨୧ର ଏକ ଗୁରୁତ୍ବପୂର୍ଣ୍ଣ ମୁକାବିଲା । COVID ସଂକ୍ରମଣ ଯୋଗୁଁ ସ୍ଥଗିତ ଥିବା ଏହି ମେଗା ଟୁର୍ଣ୍ଣାମେଣ୍ଟ ରବିବାର ଠାରୁ ଆରମ୍ଭ ହୋଇଛି ।
ତେବେ ଟସ୍ ଜିତି ଚେନ୍ନାଇ କ୍ୟାପଟେନ୍ ମହେନ୍ଦ୍ର ସିଂହ ଧୋନି ପ୍ରଥମେ ବ୍ୟାଟିଂ ନିଷ୍ପତ୍ତି ନେବାପରେ ବିପର୍ଯ୍ୟୟର ସାମ୍ନା କରିଥିଲା ଟିମ । ପ୍ରଥମ ଓଭରରେ ଓପନର ଫାପ ଡୁପ୍ଲେସିସଙ୍କୁ ପ୍ୟାଭିଲିୟନ ଫେରାଇଦେଇଥିଲେ ଟ୍ରେଣ୍ଟ ବୋଲ୍ଟ । ପରେ ଦ୍ବିତୀୟ ଓଭରରେ ମୋଇନ ଅଲୀ ମଧ୍ୟ ମିଲନେଙ୍କ ଶିକାର ହୋଇଥିଲେ । ତୃତୀୟ ଓଭରରେ ରାଇନାଙ୍କୁ ନିଜର ଦ୍ବିତୀୟ ଶିକାର କରିଥିଲେ ବୋଲ୍ଟ ।
ପରେ ଷଷ୍ଠ ଓଭରରେ ଧୋନିଙ୍କୁ ନିଜର ଦ୍ବିତୀୟ ଶିକାର କରିଥିଲେ ମିଲନେ । ଷଷ୍ଠ ଓଭର ଶେଷ ସୁଦ୍ଧା ୧୪ ରନ୍ରେ ୪ ୱିକେଟ ହରାଇ ସଙ୍କଟରେ ପଡିଥିଲା CSK । ତେବେ ଋତୁରାଜ ଗାଏକ୍ବାଡ ଓ ରବିନ୍ଦ୍ର ଜାଜେଡା ଚେନ୍ନାଇ ଇଂନିସକୁ ସମ୍ଭାଳିଥିଲେ ।
ଉଭୟ ମିଶି ଦଳୀୟ ସ୍କୋର ୧୦୦ ପାର୍ କରାଇଥିଲେ । ଗାଏକ୍ବାଡ ଦମଦାର ବ୍ୟାଟିଂ ସହ ଅର୍ଦ୍ଧଶତକ ପୂରଣ କରିଥିଲେ । ତେବେ ୨୬ ରନ୍ରେ ବ୍ୟାଟିଂ କରୁଥିବା ସମୟରେ ଏକ ବଡ ସଟ୍ ମାରିବାକୁ ପ୍ରୟାସ କରି ଜାଡେଜା, ବୁମରାଙ୍କ ବଲ୍ରେ ଆଉଟ ହୋଇଥିଲେ । ଏହାପରେ ଅଭିଜ୍ଞ ଡ୍ବାଇନ ବ୍ରାଭୋ, ଗାଏକ୍ବାଡଙ୍କ ସହ ମିଶି CSK ଇଂନିସକୁ ଆଗକୁ ବଢାଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
