ମୁମ୍ବାଇ: ଇଂଲଣ୍ଡର ଦ୍ରୁତ ବୋଲର ମାର୍କ ଉଡ୍ କହୁଣୀରେ ଆଘାତ ଯୋଗୁଁ ଆଗାମୀ ଇଣ୍ଡିଆନ ପ୍ରିମିୟର ଲିଗ(IPL) ୨୦୨୨ ସିଜିନରୁ ବାହାର ହୋଇଛନ୍ତି । ଏନେଇ ଏକ ପ୍ରମୁଖ କ୍ରିକେଟ ୱେବସାଇଟରେ ରିପୋର୍ଟ ପ୍ରକାଶ ପାଇଛି । ବର୍ତ୍ତମାନ ଇଂଲଣ୍ଡ ଟେଷ୍ଟ ଟିମ ସହିତ ୱେଷ୍ଟଇଣ୍ଡିଜ ଗସ୍ତରେ ରହିଛନ୍ତି ଉଡ୍ ।
ତେବେ ଆଣ୍ଟିଗୁଆରେ ଖେଳାଯାଇଥିବା ୱେଷ୍ଟଇଣ୍ଡିଜ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ବେଳେ ଉଡ୍ଙ୍କ ଡାହାଣ ହାତର କହୁଣୀରେ ଆଘାତ ଲାଗିଥିଲା । ଫଳରେ ବାର୍ବୋଡୋସରେ ଖେଳାଯାଉଥିବା ଦ୍ବିତୀୟ ଟେଷ୍ଟରୁ ସେ ବାଦ୍ ପଡିଛନ୍ତି । ଚଳିତ ବର୍ଷ ଫେବୃଆରୀରେ ଅନୁଷ୍ଠିତ ହୋଇଥିବା ଆଇପିଏଲ ମେଗା ଖେଳାଳି ନିଲାମୀରେ ଉଡ୍ଙ୍କୁ ଲକ୍ଷ୍ନୌ ସୁପର ଜିଆଣ୍ଟସ(LSG) ୭.୫ କୋଟି ଟଙ୍କାରେ କିଣିଥିଲା ।
ସୂଚନା ଅନୁଯାୟୀ, ଏକ ମେଡିକାଲ ଅପଡେଟ୍ ସୁପର ଜିଆଣ୍ଟ୍ସକୁ ଇସିବି ପକ୍ଷରୁ ମିଳିଛି । ଉଡ୍ଙ୍କୁ ବର୍ତ୍ତମାନ ବୋଲିଂ ଠାରୁ ଦୂରେଇ ରହିବାକୁ କୁହାଯାଇଛି । ଫ୍ରାଞ୍ଚାଇଜ ଏଯାବତ ତାଙ୍କ ସ୍ଥାନରେ ବଦଳ ଖେଳାଳିଙ୍କ ନାମ ଘୋଷଣା କରିନାହିଁ । ମାର୍ଚ୍ଚ ୨୬ରୁ ଆଇପିଏଲର ପଞ୍ଚଦଶ ସଂସ୍କରଣ ଆରମ୍ଭ ହେବାକୁ ଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
