ମୁମ୍ବାଇ: ଭାଙ୍ଗିଲା ବିରାଟବାହିନୀର ବିଜୟ ଧାରା । କ୍ରମାଗତ 4ଟି ମ୍ୟାଚରେ ବିଜୟୀ ହେବାପରେ ପଞ୍ଚମ ମ୍ୟାଚରେ ଦଳକୁ ମିଳିଛି ବଡ ପରାଜୟ । ଧୋନିଙ୍କ ଚେନ୍ନାଇ ସୁପର କିଙ୍ଗ୍ସ, ବାଙ୍ଗାଲୋରର ବିଜୟ ରଥକୁ ରୋକିବା ସହ 69 ରନରେ ହରାଇ ଚଳିତ ଆଇପିଏଲ ଟୁର୍ଣ୍ଣାମେଣ୍ଟରେ ଚତୁର୍ଥ ବିଜୟ ହାସଲ କରିଛି । ଏଥିସହ 5ଟି ମ୍ୟାଚରୁ 8 ପଏଣ୍ଟ ସହ ପଏଣ୍ଟ ଟେବୁଲର ଶୀର୍ଷରେ ପହଞ୍ଚିଯାଇଛି ।
ସିଏସକେର 191 ରନ୍ ଜବାବରେ ଆରସିବି ମାତ୍ର 122 ରନର କରିପାରିଥିଲା ।
ଚେନ୍ନାଇକୁ ମିଳିଥିବା ଦମଦାର ବିଜୟର ହିରୋ ରହିଛନ୍ତି ଅଲରାଉଣ୍ଡର ରବିନ୍ଦ୍ର ଜାଡେଜା । ଉଭୟ ବ୍ୟାଟ ଓ ବଲ୍ରେ କମାଲ କରିଛନ୍ତି ଜାଡେଜା । 28 ବଲ୍ରୁ 62 ରନ୍ର ଅବିଶ୍ବସନୀୟ ଇଂନିସ ଖେଳିବା ପରେ, ମାତ୍ର 13 ରନ ବ୍ୟୟରେ 3ଟି ୱିକେଟ ହାସଲ କରି ଚେନ୍ନାଇ ବିଜୟରେ ପ୍ରମୁଖ ଭୁମିକା ନିଭାଇଛନ୍ତି । ସିଏସକେ ଇଂନିସର ଶେଷ ଓଭରରେ ହର୍ଷଲ ପଟେଲଙ୍କ ଗୋଟିଏ ଓଭରରେ 37ରନ କରିଥିଲେ ଜାଡେଜା । ଏହା ଆଇପିଏଲ ଇତିହାସରେ ଯୁଗ୍ମଭାବେ ସର୍ବାଧିକ ମହଙ୍ଗା ଓଭର ।
192 ରନ୍କୁ ପିଛା କରିଥିବା ବାଙ୍ଗାଲୋର ପକ୍ଷରୁ ଦେବଦତ୍ତ ପାଦିକ୍କଲଙ୍କ 34 ଓ ଗ୍ଳେନ ମାକ୍ସୱେଲଙ୍କ 22 ରନକୁ ବାଦ୍ ଦେଲେ ଅନ୍ୟ କୌଣସି ବ୍ୟାଟ୍ସମ୍ୟାନ ସଫଳ ହୋଇନଥିଲେ । କ୍ୟାପଟେନ ବିରାଟ କୋହଲି 8 ଓ ଏବି ଡି ଭିଲିୟର୍ସ 4 ରନ୍ କରିପାରିଥିଲେ ।
ପ୍ରାୟ ସମସ୍ତ ଚେନ୍ନାଇ ବୋଲର ଘାତକ ବୋଲିଂ କରିଥିଲେ । ଜାଡେଜା 3ଟି ଓ ଇମ୍ରାନ ତାହିର 2ଟି ୱିକେଟ ଅକ୍ତିଆର କରିଥିଲେ । ସାମ କରନ ଓ ଶାର୍ଦ୍ଦୁଳ ଠାକୁରଙ୍କୁ ଗୋଟିଏ ଲେଖାଏଁ ୱିକେଟ ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
